من س 28 .. ل أمن الدولة العليا طوارىء

اتهام المتهمين عن كل احداث العنف من تاريخ 31مايو 2011 حتى 9 سبتمبر 2011

التجمهر واخرين بغرض ارتكاب جرائم الاعتداء على السلطة العامة ومقاومتهم بالعنف واتلاف وتخريب الممتلكات العامة حال حملهم اسلحة

استعملوا واخرين مجهولون القوة والعنتف مع موظفيين عموميين واشخاص بخدمة عامة لمنعهم عن اداء عملهم بمديرية امن الجيزة والسفارات المجاورة

حاولوا واخرين احتلال مبنى مديرية امن الجيزة بالقوة بقصد السيطرة عليه

خربوا واخرين مجهولون عمدا املاكا عامة ووضع النار فى مبان مسكونة وكذلك ليست مسكونة

اتلفوا واخرين منشات معدة للنفع العام واضرموا النيران فى عدد من المركبات وكان ذلك تنفيذا لغرض ارهابى

اتلفوا واخرين مقر البعثة الدبلوماسية للملكة العربية السعودية وذلك تنفيذا لغرض ارهابى

حيازة اسلحة وادوات تؤدى الى الموت اخر اتهام

كانت هذه الاتهامات الموجهة ل76متهم فى أحداث السفارة بالاضافة فى القضية رقم 130 لسنة 2011 حصر امن دولة عليا طوارىء
. 

 الاتهامات خطيرة والمحكمة اخطر باعتبارها محكمة امن دولة طوارىء احكامها لاتقبل الطعن بالنقض والقضية تم احالتها بقرار سياسى ، نيابة امن الدولة العليا طوارىء وضعت نصوص قانون العقوبات المغلظة لادانة المتهمين، ولذلك دى من اخطر القضايا التى سيتم نظرها الفترة القادمة عدد المتهمين 76 وضع اسم عمر عفيفى فى اخر لحظة ؟؟ من التحقيقات

 نقلا عن صفحة الناشط الحقوقي والمحامي محمد عبد العزيز
.

انا مش هضيف كتير على الكلام الي مكتوب فوق … بس بجد الموقف بقى خطر جدا وكلنا كنا ممكن نكون مكان الشباب دول … متستبعدش أي حاجه تحصلك في ظل غياب دولة العدل والقانون …

كل الي برجوه تضامنو مع الشباب دول لان مش بس مستقبلهم هيضيع ممكن كمان عمرهم كله يضيع

 أحمد عبد الكريم … السلطان الثائر …. أحد المتهمين في قضية السفاره والي ممكن عمره ومستقبله يضيع لو سبناه هو والي معاه من غير ما نقف جنبهم ونرفع عنهم الظلم

الحرية لأحمد عبد الكريم 

الحـــــــــــــــــــــــرية لمصــــــــــــــــــــــــــــــــر  

مجموعه من الشباب الثوري المصري المتهم ف أحداث السفاره

مجموعه من الشباب الثوريين ومنهم صديقنا الشاعر الجميل أحمد عبد الكريم

لا للظلم .... لا للمحاكمات العسكرية للمدنين

حكاوي الميدان .. 3

 BaDr’s SyndrOme

 واحد جاري وشه وايديه متشوهة من المولتوف في موقعة الجمل بيقولي مش هعمل تجميل ده نيشان مش تشوه

 اتحكالي عن سواق ميكروباص كان واقف في ضهر ميدان الأوبرا ينقل الي يتصاب ويرجع تاني يستني زي الاسعاف

يوم ٢٧في الطالبية معرفش يعني ايه غاز لقيت دخان جاي علي الفضول قتلني خدت نفس ومشفتش أي حاجة رفعت ايدي وطلعت أجري وسط العربيات

 يوم٢٤قولت مفيش أمل الدعوة موصلتش للشارع نزلت القهوة لقيت منشور علي كل طرابيزة والناس بتقرا وتقول رأيها

يوم٢٥ كانت ليلة امتحان فضلت أذاكر سطر وأعمل رفرش ولما شفت الضرب بليل علي الجزيرة عيطت

وم ٢٦خلصت امتحان وقريت ان في مظاهرة قريبة من جامع الحصري رحت مع أصحابي لقيت أمن مركزي ومخبرين بس

 يوم٢٧ كنت قاعد ع القهوة مع واحد صاحبي قريت ان في مظاهرة في الطالبية رحنا مشي

 ٢٧ يناير /لقينا أمن مركزي مكردن ٥٠واحد ونازل فيهم ضرب صاحبي قعد يصور لقينا عربية أتاري نازل منها ناس بتجري علينا طلعنا نجري

٢٧ يناير/رجعنا تاني ودخلنا المظاهرة ومشينا معاهم ودي أول مرة ف حياتي أدخل مظاهرة وأعرف يعني ايه غاز ومطاطي واعتقال

٢٨يناير في الهرم بعد الصلاة مشيت مع الناس لحد جامع السلام كان في ناس كتير بتهتف ومفيش أمن مركزي

٢٨يناير/المظاهرة اتحركت أول كردون كان عند المحافظة وابتدي الغاز والمطاطي واتكسر الكردون بعد ١٠ دقايق

٢٨يناير/ اتكسرت كل الكردونات وكل متر الناس تزيد لحد الأوبرا وعلي الساعة ٢ بقيت بفرق بين الرصاص الحي والمطاطي من الصوت

 أول واحد شفته بيموت للأسف كان من التدافع والزحمة

لما سمعت صوت الرصاص الحي بيزيد وناس متشالة بتنزف رجعت آخر المظاهرة وقعدت أفكر أروح أهلي ميعرفوش عني حاجة واستندلت مع مصر

دي كلمة حق من قلبك..هتوصل قلب كل الناس..تهز الظلم والفاسدين..وتلغي سنين سكوت الناس

حكاوي الميدان .. 4

marwa saleh

 ينفع اتفشخر بابويا بما انك جبت سيرة امبابه ؟؟ م.محمد صالح اللى اصر ان المسيرة تطلع من امبابه وتلفها كلها علشان الناس تشارك

 و محمد عبد العزيز و مها ابو بكر و الرفاق اللى كانوا فاتحين مكتبهم سبيل لاى حد عاوز يستريح او يدخل الحمام و ينزل تانى

زى مابنفتكرابطالنا اللى اول مرة تسمعوا عنهم افتكروا مايكل نبيل لان بغض النظر عن ارائه نزل و شارك..ووقوفك جنبه بقية الحدوتة

Eman Hashim 

امى الست المليانة الكبيرة اللى ركبها شايلاها بالعافية اللى مشيت حافية عشان ماستحملتش الجزمة من جامع رابعة فى م.نصر لحد غمرة

امى اما رجعت البيت السبت الصبح,قالت لى خالتك بتقول فى كتر ماتوا امى قالت لو ماتت تبقى زى اخواتها. والله العظيم

و عم فتحى دراكولا اللى من امبابة اللى عرفته يوم 29 بليل فى الميدان و هو من عجزه مش قادر يتكلم. و برضه بات معانا ماسابناش

ربنا يخلى لنا الحكومة.اخواتى يوم 28 مالقوش لا فيسبوك ولا موبايل و الريسيفر كله مظاهرات مصر,و المظاهرة جات لهم الشارع نزلوها ههههه

يوم 30يناير طول النهار مش عارفة ادوس ع رجلى امينة فضلت ساندانى لحد هشام مبارك اخدت حقنة و نمت على حجرها هناك

و كل ليلة كنت امدد ع الاسفلت بجسمى كله و ماكانش فى حد بيبص لى اصلا. و لو قلت عايزة الحمام الاقى تلاتة ماعرفهمش يوصلونى للبستان

حكاوي الميدان 2 .. حسام الصياد

حسام الصياد 

ـ24 يناير أجتماع لشباب العدالة والحرية بنقسم نفسنا لمجموعات وكنت مجموعة أسمها مجموعة الشهدا

ـ24 يناير فى اجتماع سكرتارية العدالة والحرية خالد السيد قافل الشبابيك طرد كل المشتبه فيهم م المقر وبيكتبلنا على ورق خطه التحرك

ـ24 يناير الخطة مجموعة هتتجمع فى ناهيا ودى هيبقو جاين خمسات من كذا مكان ودى مكانش معلن مكانها والمجموعة التانية مجموعة الشهدا

بالنسبة لمجموعة الشهدا دى كان فيها 10منهم أنا واسلام الزناتى ودول الى كانو هيتسلمو عند مصطفى محمود عشان مسيرة ناهيا تعدى

يوم 24 بليل وسام عطا وحليم حنيش يتقبض عليهم فى المطبعة

يوم 24 يناير يخرج وسام وحليم ويجو ع شقتى الى اطلق عليها فى ما بعد شقة الثورة وده هقول ليه ووسام كان جايلى بشبشب ‎:)

حكاوي الميدان 1 .. مالك عدلي

اليوم فجر 3 أكتوبر 2011 .. كنت قاعده على تويتر ولفت انتباهي أحد الاصدقاء الي بتابعهم  وهو بيكتب عن أصدقاءه وتضحياتهم في الثورة وان الناس دي تقريبا محدش يعرف حتى اساميهم .. وده طبعا لان الابطال الحقيقين ديما بيكونو ابطال منسيين والاعلام مشهودله بالتركيز على ابطال من ورق

مالك عدلي  بدأ يحكي وشوية بشوية لاقيت كل اصدقاءه على تويتر بيحكو هما كمان كل واحد بيحكي حكايه بطل .. حسيت اني عايزة اجمع كل الي بيقولوه واكتبه وانشره لكل الناس .. حكايات ابطال منسين منهم الي ضحى بعمره والي ضحى بعينه والي ضحى بفلوسه وشغله … الناس دي أولى أننا نعرفهم لان دول الي دفعو تمن الحرية .. دول الي اسقطو النظام ومدوروش من بعد كده على شهره ولا برامج يطلعو ينظرو فيها … المجد للشهداء .. المجد للابطال

….  مالك عدلي …

 فيه شابين عزاز علي قلبي اتقبض عليهم يوم سته وعشرين يناير م الدقي وراحو أمن الدوله ف الشيخ زايد وهناك أكلو علقة موت وانتهت بإلقائهم عالصحراوي بدون فلوس أو نضارات أو أحذيه حتي والحمد لله اتصرفو ورجعو وارمين وبينزفو ويوم 28 قررو برضه يشاركو ويباتو ع أسفلت الميدان لحد يوم التنحي ويوم موقعة الجمل آخر النهار قابلت واحد منهم طيب الشابين دول هما محمود نوار وزياد عدلي

زياد أخويا الصغير وأول مره يتقبض عليه بس ساعتها حضرنا التحقيقات مع الناس المقبوض عليهم من يوم 25 وكان منهم كمال خليل وهيثم محمدين ومصطفي فؤاد واللي بيتقبض عليه أيامها تقريبا مكانش ليه ديه فخبيت علي أهلي خبر القبض علي زياد وعرفت مكانه وقلت نخلص التحقيقات ونشوف هوا فين وزياد ومحمود وشباب تانيين معاهم خرجو متشلفطين واطمننا عليهم وبعديها يوم موقعة الجمل قعدت طول اليوم أدور علي زياد لحد مالقيته متعور ف إيديه ورجليه ومش عايز يسيب الميدان وقعدت أسايسه لحد ما أخدته هشام مبارك ينام وياكل وبعدين يحلها الحلال خلصت أيام الميدان ورجع زياد لحياته عادي جدا وكأن مفيش حاجه حصلت

السلطان الثائر

   مش عارفه ابدأ منين .. ابدأ من معرفتي بيه على تويتر الي لا تتعدى  15 يوم ؟؟ حقيقي مش عارفه في بدايه كلامي معاه كان فرحان اني دارسه مسرح لانهم مهتم بنفس المجال وتقريبا كان مستغرب – لاني انا خريجة حاجات كتير شوية تلخبط – بدأ يحكيلي انه غاوي مسرح وبيعمل ورش  مسرح  ف اسيوط “بلده” وكان بدايه حديثي معاه رده على تويتات شعر لمحمود درويش وانه بيحبه – معرفش هل البلطجية بيحبو محمود درويش ولا أحمد حالة استثنائية .. – اتكلمنا في اكتر من موضوع اليوم ده وللاسف من انشغالي بحاجات كتير متواصلتش معاه اكتر من كده بس فاكرة كلامه كويس وامبارح اتصدمت لما عرفت انه اتقبض عليه في أحداث مديرية أمن الجيزة … في الاول كنت متخيله انه ممكن يكون اتاخد عاطل مع باطل لحد ما لاقيت التويته دي في وسط كلامه على الاكونت بتاعه ع تويتر

@soltan_es3

وانا فعلا مش عارفه دي مجرد صدفه ولا لا ؟؟؟ السؤال هو مطلوب ليه ؟ عشان ثائر من الثوار ؟؟ عشان بيقول لا للظلم .. لا لمحاكمة المدنين محاكمات عسكرية ؟ عشان عايز حقة في البلد ميضعش ؟ عشان زيه زي كل واحد فينا عنده حلمه وعايز يحققه ؟؟؟

يا سيادة المجلس الموقر … أحمد مش بلطجي .. أحمد ثائر من الثوار الي اتحركو عشان يخلونا كلنا احرار

واخيرا انا اسفه يا احمد اني ملحقتش اعرفك كويس بس ان شاء الله ملحوقة لما تخرج بالسلامه

 دي صفحة أحمد على الفيسبوك ..  مجانين لكن شعراء

ده اكونت أحمد على تويتر للي عايز يعرفه اكتر … ElSoltan_ABkReeM

السلطان الثائر

أحمد محمود محمد عبدالكريم
شاب مصري ثوري ناشط سياسي من أسيوط
شارك ف الثورة منذ إندلاعها و حارب الفساد بعد إنتهاء الثورة
حتى شاء الأقدار و تم القبض عليه ظلما من قبل الشرطة العسكرية في يوم 9/9/2011 من أمام مديرية أمن الجيزة
أحمد إتعرض على نيابة س28 نيابات الحى العاشر يوم السبت يوم 10 / 9
وللأسف هو واللي معاه أخدوا خمستاشر يوم على ذمة التحقيق !!!
محتاجين دعائكوا ومحتاجين همتكوا معانا ف النشر أحمد مش بلطجى ولا عمره أذي حد
أحمد سافر عشان يطالب بحقه مع أخواته وياريت قبل ما أحد يقول رأيه يحط نفسه مكان أحمد وبعد كده يقول إلى عاوزه

احمد عبد الكريم واحد مننا لو سبناه يضيع … جاير اي واحد فينا يكون مكانه في يوم من الايام … مش بعيد على فكرة .. طول محنا محاصرين بقيود قمع الحريات

الحرية لأحمد عبد الكريم 

أحمد عبد الكريم مش بلطجي … أحمد عبد الكريم شاعر ثوري مصري حر

هاتعمل ايه لو بقيت رئيس الجمهورية؟؟ سؤال للمغردين

#ImEgPresident‏ سؤال طرحته على مستخدمي تويتر .. هاتعمل ايه لو بقيت رئيس الجمهورية .؟؟؟  ايه طموحك لمصر ؟ وايه خطتك ل اربع سنين جايه ؟

Eng_EmzO

‎‏ حخلى التعليم استسمارى والمدارس ليها ميزانيات مستقله استثماريه – والدوله تدفع مصاريف المواطنين ليها

_______________________________________________

nany_eg

• ‏ أول قرار حآخده إعدام حسنى مبارك وأولاده وزوجته والعادلى وجميع مساعدية المتورطين فى قتل وإصابة الثوار و حقيل شرف إقالة غير مشرفة

هاتعمل ايه لو بقيت رئيس الجمهورية؟؟ سؤال للمغردين

• و طبعا حبس جميع وزراء حكومة نظيف مدى الحياة .. أما طموحى لمصر فهو إنها تكون أعظم دولة فى العالم إجتماعيا و ثقافيا و سياسيا
•  حنضف الشوارع وحسفلت جميع الشوارع وحرجع رصيف كورنيش اسكندرية اللى اتسرق زى زمان وحهتم بالصرف و حلغى البلاعات و أعمل مصارف جانبية
•  حعمل سوق مخصوص لكل حى عشان أحل مشكلة الباعة الجائلين و حدى لكل واحد كشك فى السوق .. حجدد الأتوبيسات و أعمل محطات حقيقية
•  حعمل نظام خاص للتكسيات اللى بقت تستعبط .. التاكسى اللى مش حيقف للى يشاور حيتجاب واللى مش حيقبل بالمشوار حيتسحب منه التاكسى
•  و حعمل حد أقصى و حد أدنى للأجرة حسب مساحة المحافظة و طبعا الأجرة حتكون محدده يعنى كل كيلو بنص جنيه و حرخّص تمن البنزين
• حرجع ترام اسكندرية القديم وحرجع الأجرة بربع جنيه .. حلغى كل النوادى اللى على البحر و حعمل شواطئ نضيفة و حهد نادى القوات المسلحة
•  حعمر سيناء شبر شبر وحعمل مدن سكنية جديدة وحهتم بالصعيد.. جنوّر كل حته فى مصر والميه مش حتقطع تانى.. أهل النوبه حيبقو مصريين بجد
•  فيه مليون ألف حاجه نفسى أعملها لو قعدت أكتب مش حخلص … نفسى مصر تبقى مصر بجد
•  حجدد القطر و حعمله اكسبريس عشان اللى عايز يروح أسوان يوصل فى 4 ساعات و حوصل خط القطر لكل حته فى مصر و التذكرة حتبقى بـ 20 جنيه
• حنفذ مشروع ممر التنمية و حيبقى لكل مصرى فيه سهم أو عشرين عشان يبقى مشروع قومى و نتجمع كلنا على خير بلدنا
• حنقل الناس الساكنه فالعشوائيات للمدن الجديدة وأعمر بيهم المناطق اللى كانت مهجورة.. وحهد العشوائيات وأبنى مكانها مدارس ومستشفيات
• حفتح قصر المنتزة للزيارة تانى و كمان قاعة الأفراح اللى كانت فيه تانى .. حعمل التذكرة فى المنتزة بجنيه و حجددها من جوه
• حعمل فى المنتزة ملاهى صغيرة و تأخير عجل و أكشاك سندويتشات وحلويات و عوامات وجيت سكى فى البحر و بانانا لأنها بجد غير مستغله خالص
•  و طبعا الحاجات دى كلها حيبقى عليها رقابة فى الأسعار عشان تبقى حاجه رمزية للناس و اللى عايز يشم هوا من غير خنقة الفلوس
•  ده غير أكيد الأسعار اللى حتقل للتلات أربع و اللحمه الكيلو حيبقى بـ20 جنيه و الفراخ الكيلو بـ7 جنيه
• حقيل كل بتوع الداخلية و حدخل بتوع الحقوق من الدفعات اللى فاتت و حغير المناهج فى الأكاديمية وحسميها أكاديمية الشرطة لحماية الشعب
• مفيش حاجه اسمها صاحب مكتب معفن يشغل عنده 20 واحد يدى كل واحد 200 جنيه فى الشهر و يمص دمهم بملاليم

انا نازلة يوم 8 يوليو مش عشان الدستور أولا

يمكن في ناس ليها اسباب تانيه للنزول يوم 8 يوليو .. بس انا هانزل لأسباب تانيه

 انا هانزل عشان حق ال 800 شهيد للثورة و6000 مصاب واكتر من 1000 معتقل غير معروف مكانهم لحد دلوقتي و 21 شهيد في كنيسة القدسيين ماتو في ليله عيد وحقهم مرجعش ومئات الي اتعذبو وكل دول مسمعتش حتى الان ان في واحد اتحكم عليه بيوم واحد سجن في قضايهم

هانزل عشان عايزة اعيش ومش عايزة الناس تسيب البلد وتسافر كان عندي امل بعد الثورة ان كل الناس الي مهاجرين يرجعو لاقيت العكس بيحصل كل ما اتكلم مع حد الاقيه ضاقت بيه الدنيا وضاق حاله .. وليهم حق كل واحد صاحب بيت والي نفسه يبقاله بيته وحياته

بس انا رغم كل ده .. لسه عندي امل معرفش ايه سببه .. مش عارفه اكفر بيها .. تقريبا بقيت بحبها بجد مع اني هربت كتير من حبي ليها

متيجو نداوي جراح مصر

يمكن ربنا حرمه من نور عين من عنيه .. لكن ترك له التانيه عشان يشوف بيها مصر وهي بتتغير للآفضل

حسه بصوت جوايا بصرخ .. صوت كل واحد اتظلم واتقتل واتسحل وضاع حقه وانتحرت احلامه في البلد … شاغلين نفسنا كلنا بأننا نحط مسمى للبلد .. بتسمو ايه ؟ بتسمو طفل وليد هزيل مريض ..؟ مش نعالجه الاول وبعدين نهتم بالاسم الي هايستمى بيه .. مليون خناقه كل يوم عايزنها مدنية لا علمانيه لا اسلاميه … طب انا عايزها مصريه .. عايزاها دولة عدل .. دولة ترد حق كل واحد اتهتك حقه في البلد .. دولة الغلبان فيها ليه حق زيه زي الكبير .. المريض يلاقي علاج بكرامه من غير ما يتزل في مستشفيات الحكومة .. الي اعتقل ظلم يطالب بحقه في دولة قانون عادل ويرجعله حق .. حالات الاختفاء القسري يتعرف هما فين والي مذنب يتحاكم محاكمة عادلة والمظلوم يترد له حقه ويرجع مرفوع الراس .. الي اتظلم في تعينه في وظيفه عشان ابن فلان بيه .. يعرف يرفع قضيه وياخد مكانه .. الي تعب وكد وشقى واتنهب حقه حقه يرجعله .. حاجات كتير قوي ولو قعدت اعددها محتاجه سنين … انا نفسي نهتم بالحق اكتر من اهتمامنا بالمسميات .. نشتغل على ده بشكل حقيقي مش مجرد كلام وندوات … ده مطلوب اكيد لكن لازم نشتغل على التوازي مش كله ماشي في خط سير واحد .. لو عددنا عدد النشطاء والمثقفين الي ليهم دور في البلد هانلاقيهم كتير قووي .. محتاجين نشنغل بجد .. محتاجين ندور على حق سيد بلال .. وندور على رضا هلال اختفي فين من 7 سنين ..  نشوف حق مصابين الثورة والشهداء ونقف جنبهم لحد ما يحصلو على محاكمات عادلة تنصفهم وتكون رادع حقيقي للي يفكر يمس كرامه وحياه اي مصري .. وندور على كل واحد حقه ضايع .. منستنهوش لما يجي يطلب مننا لان هو طلب كتير ومحدش وقف جنبه .. جه الوقت الي احنا نتحرك فيه بجد عشان الناس دي وغيرهم الالاف احنا معرفش عنهم حاجه بس لازم كلنا ندور عليهم ..  عايزين نتصدى للبلطجة .. الي منهم ناس كتير غلابه مأجورين لان ده اكل عيشهم .. الي ينصلح منهم يتعمل مراكز اعادة تأهيل وناس دي تتعلم وتتغير وتلاقي عيشه كريمه ومصدر رزق شريف .. والي منهم مش هاينصلح يتحاكم محاكمه عادله ويتسجن في سجن يخرج منه حاله عدل مش اكتر بلطجة .. صدقوني دي الثورة الحقيقة .. اسقاط رموز نظام فاسد صعبه لكن الاصعب والاهم منها هو محاربه الفساد الي موجود تحت جلد البلد ومش هانقدر نستأصله لكن نقدر نعالجه

ما استحق أن يولد من عاش لنفسه فقط .. الثورة مش هاتنجح بيوم وليله ومش هاتنجح بالمظاهرات والاعتصامات بس .. هي وسيله ضغط على المسؤليين .. لكن المشكله مش في المسؤليين بس المشكله فينا احنا كمان .. متيجو نحاول نداوي جروح مصر ؟

أبطال منسيين … عبد الرحمن منصور .. مفجر ثورة 25 يناير

 

هذا هو عبد الرحمن منصور ..المجند الذي دعا لثورة 25 يناير

عبد الرحمن منصور

ليس صاحب قدرات خاصة و لاخبرة رسختها السنوات الطويلة فهو لتوه متخرج من قسم الإعلام بكلية الآداب بجامعة المنصورة إلا أنه مؤمن بأن الحرية تنتزع لا توهب من قبل مغتصب للإرادة.. مؤمن بالحرية التي شم ريحها عامي 2004 و2005 فلم يكن لديه نية أن يتراجع عن استكمال هذا الطريق.. تلك الحرية من خلال التغيير الحقيقي.

أنه عبد الرحمن منصور الذى يبلغ من العمر 24 عاماً فقط مؤسس صفحة خالد سعيد وأدمن الصفحة.. وأول من أطلق شرارة ثورة 25 يناير أو كما يعرف عنه الآن بالمجند الداعي لثورة 25 يناير.

منصور لا ينتمي للطبقة المتوسطة فوالده يعمل بالمملكة العربية السعودية منذ سنوات و يعيش في مستوي قد يجعله لا يفكر كثيرا فى ما يحدث فى مصر؛ لأنه غير متضرر منه.

مشهد من السماء

 

مشهد من السماء

يقفو مرصوصون على باب السماء ينظرون بترقب إلى الارض وخاصه إلى البقاع التي سالت دماءهم عليها

ينظر كل منهم الاخر في حيره ودهشه .. هذا المشهد مختلف عما تركوه

يبحثون عمن يحارب من أجل دماءهم الطاهرة

فيجدون أيدي ممدوة لتعبث بمقادير الامور بالامس اخان يتقاتلان وتغمرهما الدماء وبعدها تشتعل الارض بدافع الدفاع عن العرض

وتكون الوقيعه بين القبطي والمسلم

في مشهد اخر يرون إناس في زي عسكري يعتدون على شاب يقف في نفس مكانهم محاولا ان يحافظ على حقهم وعلى حق دماءهم

وفي مشهد أوسع يجدون كل مصري يبكي على ليلاه ويتصارع من أجل أفكار حمقاء

ينظر كل منهم إلى الاخر في حزن وتنهمر من أعينهم البكاء

ألهذا متنا ؟؟؟؟ ألهذا زهفت أرواحنا على يد من لا يرحم

أمتنا للتفرقو أم متنا لنعيد المجد والشرف والكرامه والقوة لشعب مصر

ينسحبون من أطراف السماء في مشهد درامي

ويعود كل منهم إلى أعماق الجنه

ويطلبو أن يحيوا في سلام والا تعرض عليهم مشاهد أخرى من الارض

…………………………………………..

طوبي لكم يا من تسكنون عنان السماء …. ويا ويل من يعيش وقد ترك دماءكم تضيع هباء

لا تصالح

لا تصـــــــــــــــــــــــالح

لا تصالحْ!
..ولو منحوك الذهب
أترى حين أفقأ عينيك
ثم أثبت جوهرتين مكانهما..
هل ترى..؟
هي أشياء لا تشترى..: