يوم من ايام الحرية 27 مايو

وطبعا ولأن أكونت الفيسبوك بتاعي جاله صدمه ومش بعرف ادخل عليه 

فقولت مدونتي أولى بيا في هذا الحدث  

ربنا ينصركم ياولاد

يوم من أيام الحرية … 27 مايو

انا هابدأ حكاية اليوم ده من الفجر .. كان عندي إحساس بالخوف والقلق على كل الناس ال هاتنزل مش تشاؤم ولا كآبة بس مرة واحده افتكرت أحداث 28 يناير والايام الي وراها مرورا بموقعه الجمل .. فكنت حسه بخوف بس مش الخوف الي يخليني متحركش لا الخوف الي يخلني انزل في وسط الناس عشان لاقدر الله لو حصل اي شيئ نكون كلنا ايد واحده تقف قصاد اي حاجه .. واستعنت بالله .. اتصلت بيا صديقتي مريان الصبح وصحتني واتفقنا هانتقابل عند محطة الترام .. مش هاطول عليكم

نزلت ووصلت لحد محطة الترام وقعدت هناك استناها .. ودار الحوار الاتي مع سيدتين كانو برضو على المحطه منهم أم معاها بناتها وام تانيه معاها طفل

طبعا الترام إتخرت فا هما قالو السبب المظاهرات وواحده ردت قالت للتانيه هما هايعملو ثورة غضب تانيه ويولعو الدنيا  .. ف انا ولاول مرة تخدني الشجاعه وادخل في حوار مع حد معرفوش في الشارع مع اني لمضه مع كل الناس الي اعرفهم وخصوصا  ع النت

فوقلتها حضرتك تقصدي مين الي ولعو الدنيا أول مرة ؟

قالتي الناس الي دخلو في المظاهرات ..

قولتها طيب ليهم علاقه بالمتظاهرين ؟؟ يعني الشباب الي تظاهرو شفتي حد منهم ولع ولا حرق ؟

قالتي لا ..

قولتها حضرتك انهارده دي مش ثورة غضب دي مظاهرة إستكمال الثورة عشان نكمل بقيت مطالب الثورة الي متحققتش

ف ردت قالتلي هما الجيش هايعملو ايه ولا ايه

فرديت قولتها .. هما الي مع حضرتك دول بناتك ؟

قالتي ايوة

قولتها لو لقدر الله بنتك كانت واقفه في بلكونه وظابط ايام الثورة نشاها رصاصه مش هاقولك نزلت وتظاهرت لا جالها كده القضي لحد البيت كان هاجيليك نوم وانتي عارفه ان الي قاتل بنتك عايش وكل يوم يأجلو محاكمته والي اداله اوامر بقتل المتظاهرين بيترقي في منصبه  .. فردت الست التانيه قالتي مهم كلهم زي ولادنا بس حال البلد واقف .. قولتها في فرق بين زي ولادنا وولادنا .. لو حضرتك ابنك اتقتل والي قتله عايش حر طليق بدون محاكمه مكنش هايبقى ده رأيك .. قالتي مهم هايعملو ايه ولا ايه هو في يوم وليله .. قولتها احنا بقالنا 4 شهور مش يوم وليله .. ليس بعد القتل دليل .. عايزين دليل ادانه ايه تاني عشان يتحاكم القتله .؟

قالتلي بس البلد مفهاش فلوس وحالنا واقف .. قولتها هو الي وقف الحال المظاهرة الي بتطالب بالحقوق ولا الي يتقاعس في تنفيذ المطالب دي ..؟

قالتلي بس ربنا يستر وميحصلش حرايق امبارح كان اقسام بتتحرق .. طبعا بناء على تطوير الحدث الي حصل فجر الجمعه في اسكندرية .. محاولة اقتحام الاقسام بقت حرايق .. قولتها حضرتك الجيران والشباب حمو الاقسام دي

والشباب الي رايحين انهارده يتظاهرو رجاله ومش هايسمحو لحد يمس طوبة في شبر في البلد .. قولتها انا رايحة تفتكري انا من البلطجية ؟؟

فسكتت والست التانيه قالتلي يابنتي ربنا يحميكم ويسترها معاكم .. قولتها بس كده ده الي احنا عايزينه منكم الدعاء .. ومتخفوش مصر أمانه ومش هانسيب حد يضيعها مننا ابدا

وجت الترام وكانت صديقتي مريان جت وركبنا ووصلنا لمكان المظاهرة عند جامع القائد ابراهيم

أنا نزلت يوم 28 يناير .. بس مش هاكدب عليكم مكنتش فاهمه ومكنتش عارفه الي بيحصل ده هايوصل لفين يمكن كنت خايفه وقتها ومكنتش فاهمه وكان في افكار كتير في بالي مكنتش فاهماها .. بس دلوقت الوضع اتغير

أول ما وصلنا طلعت الكاميرا وطبعا بدأت أصور

جت ست كبيره طيبه كده بتقول لمريان انتوا من التليفزيون .. ف مريان قالت لها احنا صحافيين ” مريان كانت زميلتي في كورس الصحافه ” المهم الست قالت لها ايه ؟

طب يا بنات متقولو للشباب العفو عند المقدرة وبلاش يحكموه الراجل تعبان وغلبان .. فمريان بصيتلي وبتقولي الحاجه بتقول كذا كذا .. فبصيت لها وابتسمت وحسيت ساعتها ان استعطاف المخلوع بالاخبار الي بتنزل عنه كل يوم بتأثر في بعض الناس .. بس على مين يا مخلوع 🙂

طبعا في خلال اليوم قابلت معظم أصدقائي الاسكندرانين الي من ايام الجامعه والي من الشغل والي من 6 ابريل وحشد وحمله البرادعي .. وقابلنا والد الشاب المعتقل محمد سعد ترك

والد الشاب المعتقل من شهر يوليو 2009 محمد سعد ترك

انا بقول كفايه كلام وهاسيبكم مع الصور والفيدو 🙂 وكل ثورة ومصر حرة اكتر واكتر

جوانا أتولدت حرية
كان في ناس بتقول ان الي هاينزل يوم 27 دول عملاء وقابضين .. فعلا احنا عملاء لمصر .. "الأم مصرية" ـ
رجالة وطول عمر ولادك يابلدنا رجالة
إحنا القلة المندسة ... ونفتخر
بنت إسكندرانية جدعه

أحنا هانكرمه ونشربه ميه مسرطنه ونركبه الاتوبيس ونسكته في شقة حمام شرك
في فرق بن النقد والهدم .. أحنا بنحب مصر واي نقد بنقوله عشان مصلحتنا كلنا

يوســف شعبان .. الصارخ في وجه الظلم

القهر مسبش حد في البلد الا لما وصل لقلبه

على فكرة الي كانو في التحرير كانو معتصمين مكونش طالعين رحله .. ودي ثورة مهياش الكاميرا الخفيه

حاكموه على سنين عمرنا الي انسرقت مننا .. على احلام كتير منا انتحرت .. حاكمو الطاغيه

الحرية للجميع

يالي انتي حبك حرية

بحبك يا مصر .. يا حلوة

مزق دفاترك القدمية كلها وأكتب لمصر اليوم شعرا مثلها

بنات إسكندرية .. مناضلات من أجل الحرية
مصر يامه يابهية يام طرحة وجلابيه الزمان شاب وانتي شبه هو رايح وانتي جايه
يوسف شعبان وحسن مصطفى .. من أبطال إسكندرية .. وقفو في وش الظلم ايام مكنش يستجري يقول يا غولة عينك حمرا

على وعلى وعلى مصر هاتفضل حره تمالي .. ارفع راسك فوق انت مصري
أنا نازل أعلم أبني ازاي يقول للظلم لا
Advertisements

23 thoughts on “يوم من ايام الحرية 27 مايو”

  1. صور رائعة أحييكى عليها:) أنا كمان إسكندرانية…و كلامك مع السيدتين مهم جدا ..إحنا اللى ينقصنا كشباب إننا نكلم الناس دى ..هم فى منتهى البساطة و الكلام بالعقل و الأدب دائما بيأثر فيهم…زى ما قدر المخلوع يأثر عليهم و هو بعيد كل البعد عنهم إحنا لازم نقرب من الناس نفهمهم اللى غايب عنهم

  2. السلام عليكم

    زيارتى الأولى .. مدونتك جميله جدا على فكره

    الفكره احنا اللى نسينا

    ماهو الناس بتوع ” هيولعوا ف بالبد ” ،، و” يا حرام الراجل تعبان واحنا معندناش أصل وعايزين نحاكمه ” .. الناس دى هى نفس الناس اللى كانت بتشتمنا فى عز الثورة ،، وهى برضه اللى كانت شايفانا موقفين حال البلد وهنخرب الدنيا

    بس المهم ان الأقلية الايجابية بتغلب الاكثرية السلبية ،،

    بالمناسبه ده مقال لبلال فضل عن فلوسنا اللى بره

    http://www.facebook.com/l.php?u=http%3A%2F%2Fwww.almasryalyoum.com%2Fnode%2F453797&h=8a787

  3. السلام عليكم ياهبة ،،،
    اولا بحييك على كلامك و روح التشاور مع الاخرين ولو ان في حاجة لفتت انتباهي ألا و هي انك بتقولي مش متعودة تتكلمي مع اي حد في الشارع و تخوضي معاه في حديث رغم انك فعلا كما قلتي انك لمضة جدا جدا جدا على النت بس لازم تدخلي في اي حديث بين اتنين يشد انتباهك و خلي بالك ان في شعرة بسيطة جدا بين انك تكوني حشرية و انك تشاركي بوجهات النظر و في نفس الوقت تفهي وجهات النظر الاخرى و كمان برده تعملي علاقات لان العلاقات بصراحة حلوة جدا ، النقطة التانية هو لسة في حد بيركب الترام ؟ و لا انتي كنتي عايزة تضيعي وقت و توصلي في اخر المظاهرات ؟ ده انتي على قلبك مراوح على كده بأى.
    النقطة اللي قبل الاخيرة هو اني بحيي و بحترم كل واحد بيساهم في انجاز اي جديد في مصلحة بمصر و بأي منظر مهما اختلفت وجهات النظر لان ده للاسف انا مش قادر اعمله ببعدي و اخيرا و اخر حاجة عشان صدعتك انتي غيرتي حسابك ليه على الفيس ؟

    1. لا الحمد لله كان حوار لطيف بس يمكن انا بطبعي خجوله شوية خصوصا مع الناس الي معرفهاش وكنت متردده جدا وانا بقتحم الحوار بينهم واللطيف اني الناس الي كانت واقفه كانت بتستمع للحوار
      وبعدين انا من عشاق الترام على فكرة بس انا كنت مستنيه صحبتي ولما الترام اـاخرت ركبنا تاكس 🙂
      ووصلنا في اول المظاهرة الحمد لله ومشينا مشي … الاسكندرانيه مظاهراتهم بحق الله بنجوب أحياء اسكندرية لحد ما رجلي ورمت .. بس يهون عشان خاطر حبيتي مصر الحلوة 🙂
      وعشان الي استشهدوا دمهم يستحق نمشي عشانه بلاد عشان نجيبلهم حقهم

  4. اعتذر عن التاخير في التعليق
    لكن صدقا لا اجد كلاما يكفي للتعليق على استمتاعي بهذه الجولة السكندرية مع صورك و الفيديو
    تحياتي لقلمك و لعدسة كاميرتك .ز ولك شخصيا 🙂
    شادي

  5. يخرب بيت جمال الصور الستات اللى فى البلكونات دول جمال قوى و صورك تجنن …اما بقى عن اسلوبك فى الكتابة فأنا استمتعت جدا بجد بالمدونة اول مرة اشوف المدونة بس شكلى حتابعها علطوا ان شاء الله
    ammtaha

    1. يا أمول يا قمر والله كلامك ده فرحني قوي وانتي الاحسن والاجمل التدوينه الي انتي كنتي كاتباها كانت هايله وهابقى سعيده جدا لو فضلتي تتابعي المدونه هنا

  6. تسلم ايديك يا هبة ..
    واضح ان المساحة لما بتزيد عن 140 حرف بتعرفي تاخدي راحتك ..
    التدوينة كانت عاوزة تطول شوية ولو بتعليقات
    طويلة علي الصور .
    🙂
    بانتظار تدوينتك عن عبد المجيد محمود النائب العام 🙂

  7. اجمل صورة عجبتني في كل دول هي صورة الست المصرية الاصيلة اللي ماسكة علم مصر وبتقول يارب فعلا معبرة اوي شكرا يا هبة على الصور الحلوة دي والثورة فعلا لسة منتهتش

  8. التنبيهات: All Results « kingofbakislami

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s