محمد سعد ترك .. مأساه لم تنتهي بعد

محمد سعد ترك

حكاية محمد بدأت من سنتين بس انا هابدأ من وقت ما عرفت والده

يوم 10 رمضان الي فات كان فطار ووقفه تضامنيه تحت بيت الشهيد خالد سعيد .. اتقابلت يومها مع الزميل المحامي والناشط محمد عبد العزيز الي هتف يومها عشان محمد سعد ترك طالب كليه طب الاسنان المعتقل في أمن الدولة من شهر 7 سنه 2009

وفي اخر اليوم سألت محمد عبد العزيز ايه حكايه محمد سعد ؟ قالي ان والده موجود هنا وهو هايقابله دلوقت فطلبت منه اني اشوفه وفعلا .. ودي كانت بدايه معرفتي بقصه محمد

قابلت والد محمد وحكالنا عن محمد .. محمد شاب في بدايه عمره من ” رشيد ”  وقتها كان طالب في كليه ” طب أسنان الاسكندرية ” السنه الثانيه .. في ” شهر 4 سنه  2009 ” جه تليفون لوالد محمد في البيت من مباحث أمن الدولة بيطلبو ان محمد يروح لهم عشان يسألوه شوية أسئلة

وبالفعل راح محمد ومعاه والده .. ويومها سألوه مين أصحابك وبتصلي في أي جامع  ومين الي بتصلي معاهم في الجامع ومين زمايلك في الجامعه وأيه نشاطاتك وأسأله كتير من هذا النوع .. وبعد ما خرج محمد دخل والده سأل هو محمد عمل ايه .. فكانت الاجابه انهم جالهم تقرير من الجامعه ان محمد ليه نشاط مع الاخوان – وده الي نفاه والد محمد تماما وقال ان محمد مكنش ينتمي لاي جماعه لا سياسيه ولا اسلاميه – والي عرفته من والد محمد يومها ان محمد وقتها كان بيمر بمرحله  اكتئاب وكان منعزل في البيت فتره طويله

وفـ يوم  26 يوليو 2009 محمد نزل من البيت تقريبا في حدود الساعه 9 قالهم انه رايح يشتري حاجات وراجع على طول … بس للاسف .. مرجعش  – يصدف ان نفس اليوم كان زياره الرئيس السابق للبحيره في نفس الليله وكان في تشديدات امنيه كثيفه جدا ـ

بطاقه وكارنيه الجامعه الخاص بمحمد سعد ترك

طبعا بعدها والده دور علىه في كل الاقسام و المستشفيات في البحيرة والاسكندرية وكل مكان ممكن يكون محمد كان فيه .. ومفيش أي أثر

ويوم 28 يوليو عمل محضر في قسم شرطة رشيد بإختفاء محمد  .. وبعدها ب خمس ايام تم إستدعاء والد محمد من قبل رئيس المباحث برشيد السيد ” يحيى رياض ” وسأل والد محمد أن كان محمد بيعاني من أي أمراض فقاله انه بيعاني من حاله إكتئاب وبياخد لها علاج وسأله عن نوع العلاج وسعر العلبه وبدائله .. وقتها كان مع رئيس المباحث طرف تاني على التليفون بيبلغه بحالة محمد وبكل الاجابات الي قالها والده عن حالته الصحية

وبعدها راح والد محمد لمبنى مباحث أمن الدولة برشيد وقابله هناك ” أحمد رفعت ” ضابط أمن الدولة الي كان رده على والد محمد انهم ميعرفوش عنه  اي حاجه  .. وبعدها راح لمقر أمن الدولة في دمنهور وجاوبوه فعلا ان محمد كان هناك ورحلوه تاني لرشيد .. ولما رجع رشيد وسأل تاني كانت الاجابه .. هو إحنا بنخطف الناس من الشوارع !؟

ولكم أن تتخيلو أن والد محمد لف على كل الاماكن الي ممكن تتخيلوها مش لانه بيطالب بالافراج عن ابنه .. كل طلبه البسيط انه يعرف ابنه فين

في خلال السنتين في أكتر من مركز حقوقي تضامن مع والد محمد ومحامين وناس كتير جدا .. وكله معندوش إجابه حتى الان ..!؟

بعد الثورة وبعد حرق مقار أمن الدولة في أغلب محافظات مصر بدأ والد محمد يدور تاني وتخيل ان في وسط الزخم ده هايلاقي ابنه .. وفي حمله الافراج عن المعتقلين .. راح وسأل .. برضو مفيش إجابه

والد محمد مقدم بلاغات في كل مكان راح للمجلس العسكري ووزاره الداخليه والنيابه العامة والنائب العام ومحطات التليفزيون والفضائيات… و لا حياة لمن تنادي

وكذلك صفحة كلنا خالد سعيد ساعدت في نشر قصه محمد من اول يوم وكرر فيها النداء أكثر من مره من اول يوم عرفنا فيه حكاية محمد ودي كانت اول صورة نزلناها لمحمد في الصفحة

فين محمد سعد ترك يا مباحث أمن الدولة

والد الشاب المعتقل من شهر يوليو 2009 محمد سعد ترك

أنا بقالي ما يقرب من سنه بدور على محمد مع والده .. معرفش أيه السبب .. بس يمكن لاني حسيت بمسؤليه تجاهه وحسيت اني ممكن أكون محمد أو أي حد من قرايبي .. أوقات بقعد أفكر في إحساس والدته ووالده لما بيدخلو أوضته وميلاقهوش فيها .. ووالدته تطلع هدومه وتشم ريحته فيها   .. أوقات بحس ان والده بيخاف يقرب من الحقيقة لتكون الحقيقة مره ويموت الامل الي عايش جواه  .. وارحع واقول  طيب لو عايش طمنوهم .. ولو مات على ايدكم من التعذيب قولوهم ياخدو عزاه .. أرحمو من في الارض يرحمكم من في السماء

وفي الاخر انا مش هاوجه ندائي لاي حد من المسؤليين .. انا بوجهه ندائي لله سبحانه وتعالى .. يارب أنت قادر على كل شيئ انت البصير العليم .. طمن قلب كل أم وأب .. انت الحق وحقهم مش هايضيع عندك

*********************************************************************

تحديث : فور نشر الموضوع على تويتر تفضل الاستاذ بلال فضل بالتواصل معي وتم الاتصال بوالد محمد وقريبا ان شاء الله سوف يعرض الاستاذ بلال موضوع محمد 

 تحديث 1 يونيو 2011 : شكرا جزيلا لصفحة كلنا خالد سعيد على نشرها للموضوع واتمنى من الله اننا نلاقي اجابه  https://www.facebook.com/ElShaheeed/posts/185936328122845

تحديث 3 يونيو 2011 : شكر خاص لأستاذة زهرة اخت الشهيد خالد سعيد لطرحها قضية محمد في حلقة اخر كلام مع استاذ يسري فوده 

تحديث 3 يونيو 2011 : مقال الاستاذة هبة عمر تضامنا مع محمد سعد ترك بجريدة اخبار اليوم .. تحياتي وتقديري لشخصها النبيل 

وجع قلب … محمد سعد ترك

تحديث 4 يونيو 2011 : شكر خاص لاستاذ بلال فضل لإستضافته الاستاذ سعد ترك  

Advertisements

76 thoughts on “محمد سعد ترك .. مأساه لم تنتهي بعد”

    1. يا دكتور أيمن
      هو لازم أسلوب السخرية و التهكم ؟
      لازم أسلوب الهجوم على المجلس العسكري ؟
      المفروض فين محمد يا وزارة الداخلية مش يا عسكر ؟؟؟

      1. ياسيدي الفاضل افترض حسن النيه ان ممكن يكون نسى حرف معتقدش ان ده موضوع النقاش ولا للجدال ولا ده مكانه لان اصلا المجلس العسكري مش هو الي اعتقل محمد دي مباحث امن الدولة من سنتين
        شكرا لمرور حضرتك

      2. كفايه بقى يامجلس ياعسكرى ظلم هاتفضلوا تداروا عليهم إلى متى ومتى سيتم
        محاسبه كل فلول النظام السافر الذى قضى على الاخضر واليابس فليجيبوا علينا إن كانت لهم عقول تعى ونحن والجميع يعلم أنهم لايملكون أفئده أين يوجد محمد ترك ؟طول مافى لسه ناس ما نعرف عنها حاجه وتائيه أمثال محمد ترك مش هنسلم ثقتنا لحد حتى المجلس العسكرى

  1. شكرا على عرض الموضوع
    أرجو إرسال تليفون والد محمد على إيميلي لكي أقوم بعمل ما أستطيعه سواء كتابة أو من خلال قناة التحرير
    ولحضرتك خالص التحية
    بلال فضل

    1. السلام عليكوم الاستاذ الفاضل بلال فضل اشكرك جدا على مجهودك الرائع وانا متابع لحضرتك من الامارات وعندي الكتير محتاج اقولة لحضرتك على الايميل يمكن ينفع عن طريقك وشكرا لحضرتك وشكرا لصاحبة التقرير العظيم دة

  2. موضوع مؤثر جدا وطريقة تناولك ليه وعرضه جذابه فعلا تشد القارئ وتكسب تعاطفه بسرعه فكرتيني بايام زمان لما كنت عايزة ابقى صحفيه وبعدين فشلت ودرست ميكانيك

  3. الله يرحم بابا لو ما كانش صمم على اعلام وعلوم سياسية كان ممكن دخلت من نفسي لكن العند بقى صممت ادرس اي حاجه هو مش عايزني ادرسها ودفعته مصاريف الجامعه الاميريكيه على ميكانيكا وهو اصلا كان استاذ علوم سياسية وصحفي الله يرحمه

    1. احييكي تحيه خاصه ياهبه علي تبني هذا الموضوع ، وارجو ان ترسلي لي تليفون والد محمد لأنني سأكتب مقالي عن مأساة محمد ،، ولكي شكري العميق ،، هبه عمر

  4. ربنا يطمن أهله عليه ويرجعه بالسلامه … وحسبنا الله ونعم الوكيل فى كل ظالم …وماأجمل أن يعيش الفرد منّا لهدف …وماأجمل من هدف يكون لخدمه الغير

  5. ربنا يطمن والده وولدته عليه … وجزاكي الله خيرا علي نشرك للموضوع وإجتهادك في البحث عنه لكي الله يا مصر كنتي مدفونة وأخرجك الله من قبرك

  6. جزاكي الله خير علي اهتمامك بس عاوزين نشوف وسيلة معينة نتفق عليها ونعملها بصورة جماعية بحيث توصل صوتنا للي العالم اللي ماسكين البلد ، عاوزين نحس ان فيه تغيير فعلا وان البني ادم بقاله كرامه زي خلق الله اللي بنشوفهم في الدول التانيه

  7. اللهم لا حول و لا قوة الا بالله. لقد سمعنا كلنا بالمقابر الجماعية فى امن الدولة و لا اعلم مدى صحة الكلام دة. بس ممكن الجثث اللى مدفونة يتعمل تحليل دى ان ايه عشان نعرف محمد فيهم و الا لا. و ادعو الله ان يلهم والديه الصبر و يقتص له

  8. كان الله فى عون اهله وندعو الله ان يكون بخير ويتم الافراج عنه والدنيا بخير بفضل من يحاولون البحث او المساعدة فى حل لغز اختفائه وتحيا مصر

  9. السلام عليكم
    اولا انا متابع موضوع محمد من فترة طويلة جدا جدا
    وبعد ثورة 25 يناير توقعت ان ربنا يفك كربه ويرجعه لاهله
    بس بعد ما عرفت بوجود مقبرة جماعية وبها 4 هياكل لبنى ادمين فى مقر امن الدولة بدمنهور
    انتابنى شعور مخيف جدا على محمد
    واسف انى اقول انى ممكن اكون تيقنت ان محمد فى عداد الموتى
    ياجماعة امن الدولة لا يرحم ولا دين لهم وحياة الناس عندهم حاجة طبيعية جدا
    يارب يخيب ظنى ويطلع محمد عايش
    بس انا عايز اقول لكم ان من اشرس مباحث امن الدولة فى مصر هيا مباحث امن الدولة بدمنهور
    من كانو يجدوه ماشى فى الطريق ويدخل مسجد او كان يظهر عليها علامات التقى كانو يذهبو لياخذوه
    وانا شايف ان لسة امن الدولة مطهرش من قيادته
    ربنا يستر

  10. ممكن تبحثو عنه فى مستشفى الامراض النفسية اللى بيبلاش على فكرة ممكن يكون عشان بياخد ادوية بعد مطلعو عينة من التعذيب الله يهدهم ياعينى جالو حال اكبر من الاكتاب وسورى فقد عقلة

    الحاجة تانية المفروض ان ميلاقو اى جسة شخص يخدو منة البصمة بتعتة ويخلوها يحتفظو بيها ممكن بعد الشر بعد سنين
    واحد يفكر انا ابنى مات غرقان ممكن يكون رمى نفسة فى حتى انا بشوف ناس كتير بتقفذ من على الكبرى والله اكتر من 3 حكايات ومنهم وحدة انا شفتها على كبرى قصر النيل بيقى لابس شنطة واحطيط فيها حاجات ويقفذ وللاسف لان بلدنا فوضى ممكن يكونو لقو جسة ودفنوها او ملقووهاش لازم تعرفو ان احنا من الدول المتخلفة فى شى واحد ان معندناش شى اسمة ملفات للبحث او نظام احنا اللى فينا منظم مش قادر يعيش بجد انا تعبت من كتر مبسمع ان واحد بعد ممات بشهور اهلو لقو جثة بس ملامحو مش هيا ياعملو دىان اة بتاعة يوقولو انة مختلف ويطلع ممرضة غبيا جدا تكون خدت عينة من شخص تانى غباء بجد واستهتار وقلت وعى دينى دينى دينى دينى وستهتار

    1. بالفعل ده حصل والده سأل في العباسيه و مستشفى المعمورة وقالو مفيش حد
      لكن انا كلمت والده ان يدور هناك تاني ويمكن يلاقي رد مختلف يارب
      شكرا لاهتمامك وردك

  11. أنا أعتقد أن الحل لموضوع محمد وغيرة كتيير هو في التحقيق الجاد مع ضباط أمن الدولة هما عندهم المعلومات يس عمرهم ما هيقولوها غير لو حسو انهم مسائلين قضائيا وممكن يدخلو السجن انما تقديم طلبات ورجاءات وحاجات زي كدة ملوش لازمة لو كان بيصعب عليهم ما كانوش خدوة من الأول

  12. لاحول ولا قوة الا بالله….انا اول مره اعرف القصه دي..طب بعد كل مهاجمات مقر امن الدوله وبعد الثورة وبرضه مطلعش طب يكون فين؟؟انا مش عاوز ابقي متشائم بس مش عارف..يارب تعرفوا توصلوا لحاجه ونطمن عليه او نفضل ورا الموضوع لحد ما ننشره بأكبر قدر ويوصل للقيادات او نوصله للصحفيين المهم اي حاجه تتعمل نعرف مصيره.

  13. نفسى اعرف يعنى ايه دكتور يختفى فى بلد زى مصر وقبلها الصحفى رضا هلال وغيرهم حسبنا الله ونعم الوكيل فى كل المسئولين عن ذلك

  14. اتمنى ان يعود د/محمد لأهله ويطمئن قلب أمه وابيه وادعو الله لهم بالصبر
    وادعو جميع الاخوة المهتمين بهذا الموضوع ان يجعلوا منه موضوع عام .بمعنى انه يوجد العديد في مثل وضع محمد وكثيرا من الاسر المصرية البسيطة التي فقدت ابنائها ولا تعرف لهم مكان.ومن شدة بساطة هذه الاسر لا تدري أو تعرف كيفية البحث وكيفية وصول صوتهم الى الاخرين
    لذا أرجو من الجميع ان تكون الدعوة عامة للافراج عن الجميع وأتضامن بصفة خاصة مع والد الدكتور محمد وادعو الله ان يحقق له مايتمنى وسوف ينصره الله لا محالة (فما مات حق وراءه مطالب) —0

    1. أتمنى ان تعلو قيمه الانسان في وطننا على اي شيئ اخر
      وانا معاكم لو في اي حاله زي حاله محمد ابعتولي والي اقدر عليه هاعمله
      شكرا لحضرتك ولمرورك

      1. انا اتذكر موقف لا ينسى ابدا عندما كنت اجلس مع محمد سعد ترك انا والاصدقاء على مقهى عروسة البحر بمدينة رشيد , لعبنا لعبة عبارة عن اننا نقسم انفسنا مجموعتين وكل مجموعة تحضر اسئلة لتطرحها على المجموعة الاخرى تنافس يعنى بين المجموعتين , محمد سعد ترك كان فى مجموعتى اتذكر سؤال محمد الذى ساله للمجموعة التى هى ضدنا قال : كم عدد شعرات الجيتار؟
        … للاسف كان سؤال سهل المجموعة التانية جاوبت عليه
        لم يعلم محمد ان الحياه لعبة نحن مغلبون فيها اذ اردنا او لم نريد , ليس كل الصحيح صواب وللاسف الصواب لم يعد صحيح , محمد سعد ترك لو رجع سير فى طريقك الى الامام واطرق الجيتار ولا تعزف على اللعبة , وا لم يعود سير للوراء واسمع عزف محمد ترك على الجيتار , على فكرة عدد شعرات الجيتار 6 شعرات , يادوب تعزف عليهم لل فاضل من حياتك لو عشت عايش او عشت ميت , انا شايف انك تموت عايش احسن ما تموت ميت .
        أحمد جمال

  15. انا اتذكر موقف لا ينسى ابدا عندما كنت اجلس مع محمد سعد ترك انا والاصدقاء على مقهى عروسة البحر بمدينة رشيد , لعبنا لعبة عبارة عن اننا نقسم انفسنا مجموعتين وكل مجموعة تحضر اسئلة لتطرحها على المجموعة الاخرى تنافس يعنى بين المجموعتين , محمد سعد ترك كان فى مجموعتى اتذكر سؤال محمد الذى ساله للمجموعة التى هى ضدنا قال : كم عدد شعرات الجيتار؟
    … للاسف كان سؤال سهل المجموعة التانية جاوبت عليه
    لم يعلم محمد ان الحياه لعبة نحن مغلبون فيها اذ اردنا او لم نريد , ليس كل الصحيح صواب وللاسف الصواب لم يعد صحيح , محمد سعد ترك لو رجع سير فى طريقك الى الامام واطرق الجيتار ولا تعزف على اللعبة , وا لم يعود سير للوراء واسمع عزف محمد ترك على الجيتار , على فكرة عدد شعرات الجيتار 6 شعرات , يادوب تعزف عليهم لل فاضل من حياتك لو عشت عايش او عشت ميت , انا شايف انك تموت عايش احسن ما تموت ميت .
    أحمد جمال

  16. ماساه بكل المعاني ان يكون ذلك الاب وتلك الام في هذه الحيره القاتله اللهم انتقم مم ظلمهم ورد اليهم ابنهم امين

  17. تحياتي لك ولموضوعك السامي
    مع سعادتي البالغة بالتعرف على الموضوع وعلى الشخصيات من خلال صفحة خالد سعيد
    ونظرا لأني لا أملك لكم أي دعم مادي، فحسبي الدعم المعنوي من خلال الدعاء
    اللهم رد كل غائب لأهله
    اللهم ول علينا من يصلح ومن يصلح
    اللهم لطفك بمحمد سعد ترك وبأهله

  18. سيدتي، لن أقول إلا بارك الله فيكِ… لقد أدعمتِ عيناي حزنًا بهذه القصة… وأدمعتها مرة أخرى فرحًا بما أراه منك من إيجابية في السعي نحو حل مشكلته

    فجزاكِ الله خيرًا كثيرًا، وأسأل الله أن يخرج محمد سالمًا من معتقله، عائدًا إلى أهله…

  19. كثيرا ما كنا نسمع عن أشخاص يستقفهم ضباط الشرطة فى الدوريات بمناسبة او غير مناسبه ونسمع بعد ذلك أنهم اختفوا وحينما يسأل الأهل عنهم فإنهم يواجهون دائما بالإجابة المعتادة (منعرفش عن ابنكم حاجة، شوفوه يمكن عند حد من أصحابه). ظاهرة الاختفاء القصري، تلك الظاهرة المتفشية فى المجتمعات العربية خاصة الدول القمعية مثل مصر وسوريا وليبيا والجزائر واليمن. اختفاء الآلاف سنويا وفجأة وبدون مقدمات. احتارت فيها منظمات حقوق الإنسان والكيانات القانونية. والإجابة دائما تكون عند ضابط شرطة مجهول. محمد سعد ترك هو مثال مصري من آلاف الأمثلة فهل هناك حل ؟ وعند من؟ عند وزارة الداخلية؟ الدفاع؟ المخابرات؟ أيا كان من له القدرة على حل الموقع فأنا لا يعنيني الآن إلا أن يأتى يوم ما لا أسمع فيه أن مواطنا مصريا اختفى والفاعل مجهول. يجب أن يفتح ملف الاختفاء القصري في مصر وأن تكون قضية عامة تتناولها الأقلام والبرامج. وألا تكون مجرد مادة إعلامية تغطي حلقة أو اثنين فقط. أنا أرى أنها يجب أن تكون قضية تناقش بشكل دائم فى كل المحافل دون انقطاع حتى تنتهى تلك الظاهرة المخجلة

    1. محمد حالة من ضمن حالات .. زي ما كان خالد سعيد جريمه من ضمن جرائم … اتمنى ان موضوع محمد يكون بداية الخيط لوقف هذه الانتهاكات والاهتممام بحق الانسان في الحياه والمحاكمه العادلة مهما كان موقف
      شكرا يا دكتور وائل على دعمك

  20. حسبنا الله و نعم الوكيل
    قلبي مع والده و و الدته و ربنا يطمنهم علية
    اللهم برحمتك نستغيث فاصلح شأننا كله و لا تكلنا الي انفسنا طرفة عين

  21. كلنا معاكى يا هبه كل المصرين اصحاب الضمير معاكى هنلقيه ان شاء الله ولو ربنا رحمه منهم يبقى هناخد عزاه كل المصرين معاكى يا هبه لازم نعرف هوه فين ده اخونا ودمنا

  22. التنبيهات: All Results « kingofbakislami
  23. لن تحتاجي لاقول لك ان تحقيقك ممتاز يا هبة ,,فقط اقول لك كم رائع صوت الحقيقة وهو ينبش وسط كوم الصمت والترويع والطمس في اوراق امن الدولة وفي الذاكرة الصامتة بفعل الخوف,,,حدار الخوف سقط ,,اتمنى ان يكون تحقيقك حجر اساس في كشف مصير الكثير من المفقودين ,,وهي قضية عربية او بالاحرى مأساة عربية بامتياز دون تميز ,,دمت ايتها المتميزة ,,ودام صوت الحق يصدح بالحقيقة ,,ليعود المفقودون الى اهاليهم

  24. لن تحتاجي الى ان اقول لك ا تحقيقك ممتاز ,,فقط اقول لك ان صدحت بصوت الحق وان تنبشين عن الحقيقة وعن مصير المفقودين وسط كوم الصمت ,,جداؤ الخوف سقط لكن الكثيرين يتشبثون بحجارة الخوف ,,اتمنى ان يساهم تحقيقك في كشف كمصير المفقودين وما اكثرهم في الدول العربية

    1. صوت الحق هو من الله وما نحن الا وسيله يحركنا الله في الاتجاه الصواب …اللهم علمني ماينفعني وانفعني بما علمتني وزدني علما .. تحياتي لكي يا ابنه تونس المناضله

  25. تضامنا العميق مع اهل المفقود و ندعو المولى عز وجل ان يعيده بالسلامة وفورا وكل التحية لصاحبه المدونه وكل الشرفاء الذين يدافعون عن الحق ،و الله كم تاثرت عندما شاهدت والد محمد وهو يتحدث عنه بكل الصبر والشموخ والعزة واحتساب المصيبة التى هو فيها عن الله ، ايمان نتمنى ان يكون لي مثله ،، كم انت عظيمة يا مصر بابناء الشرفاء واهلك الانقياء و لن نسكت حتى يعود كل كل المختظفيين و المبعديين وكم اجببناك يا اخ محمد بدون ان نراك الحرية لك

  26. اهالى رشيد وضواحيها خالص الشكر للمدون وللاستاذ بلال فضل ومراكز حقوق الانسان والمحامين المهتمين بحقوق الانسان للاهتمام بقضية محمد ترك

  27. المفروض قضية محمد تبقى قضية رأى عام زى قضية خالد سعيد بالظبط
    كل الجرايد تتكلم عنها كل برامج التوك شو ,كل المدونات,كل الصفحات الكبيرة على الفيس بوك,
    واعتقد ان ده الحل الوحيد ان نقدر نلاقى حد يرد علينا علشان الحكومة دلوقتى بتخاف من الشعب جدا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s