انا نازلة يوم 8 يوليو مش عشان الدستور أولا

يمكن في ناس ليها اسباب تانيه للنزول يوم 8 يوليو .. بس انا هانزل لأسباب تانيه

 انا هانزل عشان حق ال 800 شهيد للثورة و6000 مصاب واكتر من 1000 معتقل غير معروف مكانهم لحد دلوقتي و 21 شهيد في كنيسة القدسيين ماتو في ليله عيد وحقهم مرجعش ومئات الي اتعذبو وكل دول مسمعتش حتى الان ان في واحد اتحكم عليه بيوم واحد سجن في قضايهم
هانزل عشان عايزة اعيش ومش عايزة الناس تسيب البلد وتسافر كان عندي امل بعد الثورة ان كل الناس الي مهاجرين يرجعو لاقيت العكس بيحصل كل ما اتكلم مع حد الاقيه ضاقت بيه الدنيا وضاق حاله .. وليهم حق كل واحد صاحب بيت والي نفسه يبقاله بيته وحياته
بس انا رغم كل ده .. لسه عندي امل معرفش ايه سببه .. مش عارفه اكفر بيها .. تقريبا بقيت بحبها بجد مع اني هربت كتير من حبي ليها
فين ايامك يا ثورة
لو عايز تنزل يبقى انزل عشان تخليه يشوف بعينه الي فضلت ليه الي ضاعت عينه عشانه
ياريت مننساش
نفسي لما يكبر يحس انه شارك في حاجه غيرت مصر للاحسن
أزاي بقيتي مكمله وده كل ده فيكي حصل
حوض 13 : نفسي الناس دي تعيش في بيت له سقف
حوض 13 : نفسي الطفلتين دول يعيشو في بيئة نضيفه ويتعلمو

انا ماليش مطالب غير ان أعرف أعيش وأشتغل وأنا وكل شباب جيلي الي يحب فينا انه يبقاله بيت واسره يقدر يكونها من غير ما يتشحطط في بلاد الله لخلق الله ويرجع عنده 40 سنه بيفكر يتجوز … لسه فاضل عندي شوية احلام نفسي احققها قبل ما اموت .. نفسي مشوفش واحد بياكل من الزباله .. نفسي مشوفش طفل محروم من التعليم وبيشتغل صنايعي .. نفسي أشوف العامل والفلاح في بلدي ليهم قيمه ومكانه لانهم دول ايدين مصر الي بتبني وتزرع  .. نفسي مشوفش واحد مريض بيتعامل في مستشفي الحكومه على انه شحات ويتقاله تعال كمان سنه اتعالج ده لو كان لسه ربنا كاتبله عمر … انا عارفه ان ده مش هايجي في يوم وليله لكن ده هي المطالب الحقيقية للمواطن المصري الي هو مش من النخبة وانا مش من النخبة انا زي زي كل الناس دي انا دي مطالبي … انا عايزة اعيش بكرامه وامان وبلد فيها قانون وعدل .. عايزة اكل واشرب واسكن واعلم ولادي .. لو هانزل هاطالب بكل الكلام الي فات  ده

حق الشهداء محاكمه القتله والتكريم لأهلهم

حق المصابين من علاج وتكريم

معرفة طريق المعتقلين الي اهلهم بيدورو عليهم

شهداء كنيسة القديسيين .. فين الي قتلهم متحاكمش ليه

كل واحد اتعذب وليه قضيه مفتوحه يتحكم فيها

قضية السيد بلال وكل الي زييه

مش عايزة اشوف بواقي الفاسدين

عايزة اضمن ان كل واحد في البلد ليه حق في العلاج والدخل والتعليم

عايزة اعيش هاكتبها بخط عريض وهانزل بيها .. ا نا عايزة اعيش في بلدي مش عايزة أهج


أسيبك لمين ؟؟؟؟؟

Advertisements

8 thoughts on “انا نازلة يوم 8 يوليو مش عشان الدستور أولا”

  1. المشكلة ان فيه ناس هتقولك مش وقت المطالب دي عشان الحالة الاقتصادية .. طب دول هتردي تقوليلهم ايه ؟

    انا كمان نفسي ف كل الحاجات اللي انتي قلت عليها .. بس ابتديت أيأس حاسه انو مافيش حاجة هتتغير والحكاية هتاخد وقت طويل بس محتاجة نفضل نطالب بيها

    كتير بقول لنفسي يا مين ينولني اسافر بره ومش هرجع من كتر ماانا محبطة .. بس ساعات بقرأ اخبار بتديني امل وان مش كل حاجة وحشة

    خليني اقول انا لسه عندي امل رغم كل حاجة ان مصر تبقى احسن بلد ف الدنيا وناسها مش محتاجين يسافرو برة وتطلع عينهم عشان يعيشوا عيشة محترمة ف بلدهم … يارب

    ربنا يحقق أمانيك يا هبة 🙂

  2. بعد التحية ..
    تم اضافة مدونتكم الى ـ مدونون بلا قيود ـ
    وسوف ننشر مواجز وروابط لكل تدويناتكم خلال نصف ساعة من نشركم لها
    لمزيد من التفاصيل http://modawenon.tumblr.com/icq
    ولكم فائق الحرية والاحترام

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s