تخلص من العقد الي جواك

أحنا شعب معقد … ايوة شعب معقد وكل واحد فينا جواه كلكعيه وكلكيعه قـــــــد كده … مع احترامي للقليل من الاسوياء ودول يا هجو من البلد من زمان يا قاعدين ومتقوقعين على نفسهم

انا بقالي فتره مكتبتش وناس كتير لاموني على ده .. انا يمكن طريقتي مختلفه ف الكتابه انا مبعرفش اكتب الا لما شيئ يستفزني … انا فاكرة اول مرة كتبت من قلبي كان بعد ما عرفت ب حادث استشهاد “خالد سعيد” ومن وقتها وانا بكتب وتوقفت الشهر الي فات عن الكتابه لاني كنت حسه اني مشوشه ومضغوطه من شكل الاحداث الي بتحصل الي كتير منها مبهم بالنسبه ليا شخصيا

بس انهاده وانا ماشيه في الشارع شوفت منظر استفزني بشكل الي خلاني وقفت اشوف المنظر واسترجع  احداث كتييييير عدت علينا الفتره الي فات بداية من قتل خالد مرورا بكل حوادث التعذيب واحداث الثورة

كنت معديه من جنب ام وابنها ومعاها اخواتها سيدات كبار وواضح انها كانت واقفه تتشتري حاجات من السوق وابنها في ايده موبايل بتاعتها وف لحظة الموبايل رن وابنها الطفل الي لم يتجاوز 11 سنه على تقديري قرر يرد على الموبايل وما كان من الام في اللحظة دي الا انها استجمعت قواها وقامت ضربه ابنها على وشه ألم أعتقد ان صوته وصل لعنان السماء في دهشه من كل الي حواليها والولد نفسه اصاب بالذهول وهي بكل برود متناهي شدت الموبايل من ايديه وكملت الحديث ايوة يا حبيبي ايه الاخبار لا ولا يهمك .. انا وقفت للحظات بنتظر حد من الي واقفين جنبها يعنفها او يقولها انتي عملتي ايه صراحة مفيش غير البائع قالها ليه كده يا مدام … وللاسف انا جالي حالت صدمه وندم بعد ما مشيت لاني بصراحه كان في كلمه نفسي اقولها ليها .. انتي لو في بلد بتحترم الانسان كان ابنك ده اتاخد منك فورا وراح لأسره محرومه من نعمه الانجاب عشان انتي متعرفيش قيمه الطفل الي ربنا وهبه ليكي … لكن للاسف معملتش كده لاني في اللحظات دي شوفت لقطات كتير قوي متتاليه .. خلتي احس اننا مجتمع الخلل ماليه من ساسه لراسه .. لو اسقطنا كل الانظمة .. طيب والعقعد الي جوانا ؟؟؟ ثقافه التعذيب الي معششه جوانا في بيوتنا ومن أهالينا من تعذيب مادي لنفسي لمعنوي

العنف الاسري لا يتجزأ عن العنف في المجتمع

”  ثقافة الضرب .. الضرب يولد العنف .. والجبن” 

منذ نعومة أظافرنا ونحن نجد أبائنا يحاولون تقويم سلوكنا عن طريق حاسة اللمس فمثلا عندما كنت طفلة صغيرة كنت أجد أبوى عندما أفعل شيئ خطأ يقولون الكلمه المعهوده ” كخ” مع الضرب على اليدين لعدم تكرار الفعله وهذه الفعله يقوم بها معظم الاباء ولايدركون بها انهم يأسسون داخل الطفل نزعة عدوانية نتيجة هذا الالم الجسدي والنفسي ولا يدركون عواقبة عند الكبر 

“لما تنضرب هاتتعلم”
من منا لم يضربه ابوية عندما يفعل أي غلطة … من منا لم يقوم معلمه بضربه لعدم تأدية فروضه المدرسية  … من منا لم يلعب الضرب والعنف دورا هاما في حياته 

يرى مجتمعنا المصري ” الذي انا بصدد التحدث عنه فلا يعنيني باقي المجتمعات العربية ” أن الألم البدني يقوم سلوك الفرد  بداية من نعومه أظافره إلى أن يصبح كهلا  .. وبذلك نرى أننا نشأنا في مجتمع أعطى نفسه الحق من البداية لأن يقوم سلوك الفرد بالعنف ” حتى لو كان ابنه” فما بالنا بممثلي القانون الذين يرون أن لأنفسهم الحق في فعل ما يشاء بالمواطن الذي هو بالنسبة لهم مجرد شيئ وليس إنسان له حقوق 

إذا كنا يجب ان ندين أحد في العنف الذي يقع علينا والذي يمارسه علينا ممثلي القانون … فيجيب من البدايه ان ندين أنفسنا 

نحن من زرع في مجتمعنا ثقافه الضرب ” الضرب الي بيعلم” والذي هو في الحقيقة لا يعلم أي شيئ  .. وإن كان له تأثير فهو تأثير سلبي على نفسيه الطفل إلى ان يصبح رجلا  ..  تأثير يزرع الخوف من العقاب الجسدي الذي يجعله فيما بعد يمشي جنب الحيط متخوفا أن يطالب بحقوقه ” بدل ما يتسحل ”  .. لا يغير الله ما بقوم حتى يغيروا ما بأنفسهم

ربي أبنك صح عرفه حقوقه كأنسان لا تجعله يشعر ان العقاب الجسدي هو سبب ان يتعلم  .. أبناءنا أمانه وتربية مجتمع على قيم ومعرفته لحقوقه مسؤليتنا وليست مسؤلية الحكومه .. التغير مش هايجي انهارده التغير هايجي من بداية جيل جديد جيل يتربي صح يعرف حقوقه وواجباته يوم ما يكبر ويبقى مسؤل مش هايهين حد لانه في البدابة محدش اهانه 

انا القيت الضوء على المشكله من بعيد مع العلم ان لها جوانب كثيرة أخرى ولكن أترك لكم البقية والتعقيب 

انا مش لاقيه كلام أنسب من الموضوع ده عشان اعلق بيه على الي شوفته انهارده والي كلنا بنشوفه كل يوم … انا كتبت الكلام الي فات بعد ما خالد اتقتل ب ايام وكنت اتمنى اني الاقي حاجات كتير اتغريت بعد كل الاحداث الي مرينا بيها ..  بنطلب من ممثلي القانون انهم يحترموا اداميتنا واحنا مبنحترمهاش ولا اهلينا ربونا على كده ولسه في ناس بتربي ولادها على العبودية والتعذيب والاهانه والجبن

استقيموا يرحمكم الله … متضيعوش مننا كل حاجه حلوة كفايه بقى

Advertisements

6 thoughts on “تخلص من العقد الي جواك”

  1. بصراحة كلام ممتاز وبيفكرني بشوية ظواهر كده الواحد دايما بيشوفها ويسمعها زي ان الشعب المصري ميمشيش غير بالجزمة ولازم يتضرب علشان يخاف ولازم الحاكم يبقي قوي ويكربج البني آدمين وكلها عبارات مستوحاة من مجموعة الكلاكيع اللي موجودة في العقل الجمعي للشعب المصري … بجد مقالة كويسة … استمري

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s