أنا مناوئ إذا انا موجود

أيوة انا مناؤة ” مؤنث مناوئ” ولما دورت في معجم اللغه العربيه لاقيت معنها  : نوأ : ناوأَ يناوئ، مُنَاوَأةً، فهو مُنَاوِئ، والمفعول مُنَاوَأ  :: ناوأ الشَّخصَ  ::  عاداه “ناوأه خصومُه- ناوأ الاحتلالَ”

ينهار اسود .. يعني انا كل ده .. وانت كمان كده كل واحد هايقول لا في البلد دي على اي حاجه هايبقى مناوئ .. بعد ما كنا قلة مندسه وبلطجية ومحرضين بقينا مناوئيين .. لوووولي

على فكرة انا مخنوفه من كل الي بيحصل حواليا …  من كام يوم استشهد أحد الشباب  ” محمد محسن ” الي خرج في أحداث العباسية متأثرا بجراحه واصابته الي كانت بناء على تحريض أحد القاده – الي احنا بناوءهم –  بضرب المتظاهرين وفي نفس اليوم اتصاب الشاب محمد هارون ” عمل عملية و كان عنده كسر فى عظام الجمجمة وجزء من العظم ده اتفرفت والاخر اتكسر و قطع الغشاء اللى قبل المخ ” طبعا ده كان تشخيص الاطباء قبل ما يطلعو محمد من مستشفى الدمرداش قبل ما يطمئنو على استقرار حالته والي عرفت بيها من خلال تويتر لما كان اخوه بيدور على اي حد يقف جنبهم ويطمنو على حالة محمد الي كانت غير مستقره … لكن الحمد لله محمد انكتبله عمر جديد

محمد محسن ومحمد هارون الاتنين كانو في نفس المستشفى ولولا  فضل ربنا على هارون يعالم كان زمان ايه حصله دلوقتي …

الي صدمني ان محمد هارون مش قادر يقدم بلاغ في الي حرض على ضربه لانه معندوش دليل كافي ضده .. ومشكله انه خايف .. خايف على مستقبله ل يتهموه بالبلاغ الكاذب ويلبس في محاكمه عسكرية بدون ذنب

هو احنا لسه بنخاف !!!! هو احنا راح مننا اكتر من 850 شهيد غير المفقودين واكتر من 6000 مصاب منهم حوالي 2000 واحد فقدو عنيهم عشان احنا نفضل نخاف .. ينهار اسود !؟ هو احنا خلصنا من طاغيه جبنا بداله كـتيبة طغاه؟

الحل ايه ؟ محمد سألني إمبارح اعمل ايه معرفتش ارد عليه .. حتى مراكز الدفاع عن حقوق الانسان مش عارفين يردود عليه لانهم معندهمش الدليل الكافي … طب محنا معندناش دليل كافي برضو ان مبارك قال اقتلو المتظاهرين يعني محدش ماسك عليه ورقه ولا حد مسجله فيديو .؟ هو ايه الدليل الكافي للتحريض على قتل محمد محسن وعلى اصابه هارون وغيرهم ؟؟؟ حد يرد عليا عشان انا بجد في حاله لا يرثى لها .. حق الناس دي مين هاجيبه ؟ حق الشباب الي انضربت اول يوم رمضان مين هايجيبه؟؟ حق الناس الي اتسحلت في التحرير لمجرد انهم تجمعوا عشان يفطرو في الميدان مين هايجيه يا ناس … الناس هتفت في الثورة الشعب يريد اسقاط النظام .. كل شهيد مات و على راسه المطلب ده … مبارك مجرد ركن من اركان الفساد لكن في غيره الف مبارك عايشين ولسه بيدو أوامر بقتلنا وهت عرضنا

على فكرة يا شعب .. احنا في ثورة يعني مش مطلوب مننا نقعد نحط ايدينا على خدنا مستنين فرج ربنا … يعني الي عايز حقه لازم ينزل ويطالب بيه وكلنا عايزين حريتنا وعايزين البلد دي تبقى بتاعتنا مش بتاعت حد تاني مهما كان .. مش عايزينها ب اسم حد البلد دي بتاعت المصريين كلهم مش أي فئه منهم ومش هانقبل حد يحكم مصر لا ب اسم العسكر و لا ب اسم الدين ولا حتى ب اسم العلمانيه … مصر هاتحكم ب اسم كل مصري عايش فيها بالقانون والي مش عاجبه يورينا عرض كتافه

اوعو تنسو 9 مارس و 8 ابريل و احداث العباسيه واول يوم رمضان … الحساب كل يوم بيتقل وانا مبقتش عارفه ايه الي جاي للبلد دي … لو ملهاش حل قولولي عشان الحق الي باقي من عمري واهج بلاد الله واسعه وانا بجد مبقتش قادره اشوف وشوش الظلم معششه في وسطنا …. يسقط يسقط كل مبارك

محمد هارون أثناء تواجده في المستشفى وإصابته في الرأس
التقرير الطبي الخاص بحالة محمد هارون - مستشفى الدمرداش - كسر منخسف بعظام الجمجمه
الشهيد محمد محسن
الشهيد محمد محسن لحظة إصابته في أحداث العباسيه
Advertisements

One thought on “أنا مناوئ إذا انا موجود”

  1. لا تعليق…المشكلة يا هبة ان فيه ناس لحد النهاردة بتقولهالي بالحرف : احسن ان محمد محسن مات و ياريت كان مات معاه ناس كتير
    مع انهم مش ضد الثورة…بس فاكرين ان بتوع العباسية مثلا دول بيركبوا الموجة و بيقولوا ان اللي نزلوا فطروا يوم الجمعة دول منزلوش في ايام الثورة…النظام بعد ما كان مفهمهم ان احنا غرباء مندسين…فهمهم انهم هما الثوار و احنا اللي مندسين برضه قافزين عالسلطة

    الحل يبدأ من توعية الناس في رأيي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s