ليله العيد وقفه صامته تمجيدا للشهداء وتجميعا لمطالب الشعب

Power of Silence

 #SilentStand , #egypt , #tahrir , #Jan25 , #Cairo , #Giza , #Alex ,  #Alexandria ,  #Suez ,  #PortSaid    

فاكرين الوقفات الصامته أول واقفه صامته كانت يوم 18 يونيو 2010 بعد قتل شهيد الطوارئ “خالد سعيد” بشكل وحشي على ايد جلادين الداخليه  .. يومها دعت صفحة خالد سعيد – الي كان غير معروف مين صاحبها-  لأول وقفه صامته والي اقترحها احد شباب الصفحة .. كان شيئ غريب بالنسبه لينا اول مرة نزل عدد قليل وبعد كده الوقفات بدأت تزيد والاعداد تزيد وصوتنا بدأ يوصل .. كلنا نزلنا نقول للظلم لا .. بدون توجهات بدون قائد بدون منصة نتكلم عليها ولا حد فينا وصي على حد .. مجرد تعليمات للامان كانت بتتكتب على الصفحة خوفا من بطش الداخليه بالشباب الراقي الي نازل يوصل صوته …. الي هو برضو نزل يوم 25 يناير وطول ايام الثورة يقول للظلم لا و نزل يوم 27 مايو ويوم 8 يوليو … بس في فرق واحد بدأ يظهر بعد يوم 11 فبراير .. ان بدأ يظهر في وسطنا “ناس يفط” ايوة ناس يفط حزب فلان و جماعه علان … وابتدينا نتقسم وابتدينا نضيع وابتدى حق الشهداء يضيع وحق المصابين وحق المعتقلين … وبدأت الاضواء تركز على ممثل ائتلاف مش عارف مين و ممثل حزب وداد قلبي … طب والناس ؟ والشعب المطحون ..؟ وطلباته .؟ والشباب الي ماتو واتصابو .؟ فينهم دول فين حقهم .. الي مش هو بس اننا نطالب بمحاكمه قاتليهم .. لا حقهم علينا اننا منستغلهمش سلم عشان كل واحد يوصل لكرسي من الكراسي .. اظن انتوا عارفين ان الكراسي عندنا في مصر بتكهرب … المهم مش هاطول عليكم المقدمه

أولا: انا ضد فكره الشعب واي حاجه تانيه ايد واحده … احنا كلنا لينا أراءنا وتوجهتنا وافكارنا وسياستنا المختلفه ,, مش مطلوب اننا نبقى نسخ كربون من بعض .. بس مطلوب اننا نعرف نسمع بعض

ثانيا : انا مع احترام كلمه كل فرد في الشعب المصري والناس شايفه ان التظاهر شيئ مزعج بالنسبه ليهم .. حتى لو احنا شايفين عكس كده مفروض اننا نوصل ليهم ده بشكل هما يتقبلوه ومنفرضوش عليهم .. مصر مش بتاعت السياسين بس ولا بتاعت الثوار بس شئنا ام ابينا مصر بتاعتنا كلنا ولازم نستجيب لرأي الاغلبيه ونسمع لهم ونفهمهم وجهة نظرنا بهدوء

طيب ايه الحل ؟ الحل الي فكرت فيه اننا نرجع للوقفات الصامته من تاني .. الوقفات الي وصلتنا في يوم اننا نعمل ثورة لانها علمت الناس تنزل الشارع وتطالب بحقها حتى وولو بالصمت الي هو احيانا بيكون ابلغ لغه للتعبير خصوصا في الاوقات الي بيكون فيها في دوشه كتير قوي زي الي بيحصل دلوقتي

 بفكر نرجع للوقفات الصامته من تاني … نلبس اسود وكل واحد يطبع صورة شهيد وننزل نقف حداد على ارواح الشهداء في كورنيش كل محافظة كمحاولة من جديد لكسب الشارع

احنا محتاجين للناس في الشارع لكل مصري محتاجين نرجع الناس تاني تحس بمصر وان لسه موصلناش بيها لبر الامان .. الوقفات الصامته قدرت تجمع ناس كتير وانا كنت منهم

 الوقفات الصامته مهياش خوف من حد دي محاوله لحشد الشارع للمطالب من جديد بشكل راقي متنسوش تأثيرها في قضيه خالد سعيد

الوقفات الصامته مش هاتكون عشان عداء لحد .. الوقفات دي هاتكون عشان الشعب المصري عشان نفكره ب 1000 شهيد و 2000 واحد فقد عينه

الوقفات الصامته هاتكون عشان نفكر الناس بالمصابين و المعتقلين و المحاكمات العسكرية للمدنين المرفوضه عشان نفكرهم ان ليهم حق لسه مخدهوش  .. وبعد كده القرار للشعب

 ايام وقفات خالد سعيد الناس كانت بتسمع وتفهم وبتنزل متحمسه عشان عارفه انها نازله تطالب بحقها بدون وصي عليها ولا حركه بتفرض رأيها

الوقفه الصامته تبدو للبعض شيء بسيط لكنه كان بدايه لصحوة الشعب المصري وسلاح آمن ليه ومفيهوش خطر ولا تعطيل لمصلحة حد بالعكس تماما

ملالاين الناس نزلت من بيتها بسبب الوقفات الصامته كل واحد نازل ب حلمه وألمه يقوله بنفسه مفيش وكيل عنه ولا منصه بميكرفون

 لو هاننزل في وقفه صامته يبقى عارفين اننا نازلين عشان مصر وعشان شعب مصر وعشان دم الشهداء والمصابين والمعتقلين وكل مظلوم

احنا مش نازلين لا نوقف عجله انتاج ولا نازلين نحرض على حد احنا نازلين نقول رأينا للناس مش للمجلس بشكل متحضر  احنا محتاجين للشعب

رأي لوحده مش كفايه …. رأي الشعب اهم من رأي الفرد لوحده .. لازم ننزل للناس ونفهم ونوريهم ايه الي لينا والي علينا

 انا بقترح الفكره ولو موافقين يبقى الوقفه في اخر يوم في رمضان نفطر في الشارع …  يومها مش هايكون في تراويح وتكون البدايه من بيت خالد سعيد

انا بكررها تاني ومش خوف من حد انا بقول ورزقي على الله … احنا نازلين للناس نازلين نتصالح عليهم ونقرب منهم ونقرب تاني من مشاكلهم ونعيشهم معانا مشاكلنا

قدمنا حوالي 12 او 13 يوم لو موافقين ده ايفنت للوقفه ياريت تنشروه ونسمع رأي الناس 

رجاء من اهالي القاهرة … اليوم ده بلاش يكون في ميدان التحرير مش لاي سبب .. غير اننا عايزين مكان يقف فيه كل المصريين حداد على روح الشهداء في مكان مكان في مصر

الطلب الاخير من كل مصري لو هاتنزل خد معاك صورة شهيد وورقه فيها اهم مطالب ليك عايز تشوفها في مصر

مش مسموح لاي حد ينزل لا ب يافطة حزب ولا جماعه ولا اي حاجه غير علم مصر وصورة الشهيد والورقه الي فيها حلمك أو ألمك

اتمنى ان تكون الفكرة دي حاجه تقدر ترجع المصريين تاني يبقو صف واحد بدون منصات بيتنازع عليها الاشخاص ولا هتافات بتفرق ومتجمعش

الوقفه هاتكون ان شاء الله يوم 29 رمضان الساعه 6 ونص في كل مكان في مصر على كل كورنيش واتمنى من شباب المحافظات ينشرو الفكرة بنفس الطريقه الي انا كتبتها ….

ارجو منكم الالتزام بالي مكتوب والي هاينزل ويشوف حاجه غير كده يروح بيتهم … هايبقى ملهوش لزمه يضيع وقته في شيئ مش هايفيد مصر

إذا مش نازلين للناس ف بلاش
والزم بيتك.. بيتك.. بيتك
وابلع صوتك وافتكر اليوم ده
لإنه تاريخ موتى.. وموتك.
إذا مش نازلين للناس فَ بلاش
مادام الدايرة ماكاملاش
والحاجة ماتاماش
وأصحاب الحاجة ماعارفاش
إيه المعني وأى بطولة
ف إن حياتنا
واحلا سنينَّا
يروحوا بلاش؟
حاجة ماراكباش!!

***

الله يخرب بيت الفكر
وبيت اليوم
اللى ورانا الفكر
لإن الفكر كتاب
و(عويضة)
حياته هباب وتراب.
عايش زمنه الكداب
زى العادة ـ مرتاب!!
كنكة على دِمْس
ونفَس
مقطوع فى الغاب
ماشبعناش عنه بُعد
وهوه
ماشبعش غياب!!

***

(عويضة)
هنا.. ك فى الأرض
فى المدن الأُوَض
اللى نايمة على بعض!!

***

وأقولك
إيه اللى قطع الدايرة يا أمير
وخلى مابين النبى والخلْق
الغربة.. وتقطيع المشاوير؟
إن انا وانت
بنلعب طول العمر دورين:
طليعة وجماهير.
و(عويضة)
بينفخ موت الدِّمس
والعالم..
نِمْس.
العالم..
سرقة وقلْع ولبس
و(عويضة) بقلبه الجبس
اللى معلِّمُه..
إمتى مايحسش
وامتى يحسّ..
بيعدِّى فى الأيام
جمل المراحيل.
زى ما عدَّاها
من أول ما اتخرط الكون
من أول ما طلع للدنيا
ووجد قبلُه..
فرعون!!

***

نفس الأيام
نفس النسخة
مطبوعة
على كل الأعوام.
ماسمعشى بينا
ماسمعناش.
ماقابلناش.
ما اتكلمناش.

***

ولإن حمول الأيام
مش مرفوعة
إذا يد (عويضة)
ماترفعهاش.
والقولة الحقَّة
مش حقّة
إذا صدر (عويضة)..
ماطلَّعهاش
والخطوة..
حتفضل مشلولة
إذا قُدّامنا (عويضة) ماخطَّاش.
ولإن دى حاجة
(عويضة)
لسّه مايدركهاش
ولايدركناش
ولا يعرفناش
ولإننا..
لما دبحنا بعض
ـ مناقشة ـ
على القهوة
ـ لاجل البشرية ـ
(عويضة) ماسمعناش
تبقى الدايرة
مادايراش!!
واما ييجى المخبر
يسحبنا ع الزنازين
لازم نبقى عارفين
إن السَّحبة ببلاش
وان الحدوتة
مالافَّاش
ف الدايرة ماتامَّاش
والدنيا.. ماحِلْواش
وان (عويضة)
لما قِبل الظلم ماماتْش
إحنا مُتنا..
وهوه.. عاش!!

***

الحاجز..
أكبر من كل الأحلام
واسْمَك..
من جهلى وجهلك..
واسمى..
واسمك!!

***
مش حتعلمنى أكتر ما اتعلمت
روح
علِّم أبو الواد والبت
اللى حيرميهم
فى فرن الثورة
يطيبوا بُكرة
واللى لحد الوقت
مايعرفشى إزاى يكتب
وازاى يقرا.
وازاى يعشق..
وازاى يكره.
ولا عنده فكرة
عنك.. أو عن بكرة
ولا ليك ذكري
لانا.. ولا إنت..
نجحنا ف تغيير الفكرة!!

***

الفاس يردم بذرة
المنجل يحصد سبلة
الشغل يجيب أجرة
وانت بعى….ـد
بحكاية
مامفهوماش!!
بينَّنا وبينُه شعْرة
وأرقّ من الشعرة
ده اللى مفروض
ناسج علم الثورة
وصانع بكرة
واحنا شهدا..
مع إننا.. ماحاولناش.
حاجة..
ماراكْباش!!

عبد الرحمن الابنودى

Advertisements

2 thoughts on “ليله العيد وقفه صامته تمجيدا للشهداء وتجميعا لمطالب الشعب”

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s