حكاوي الميدان 2 .. حسام الصياد

حسام الصياد 

ـ24 يناير أجتماع لشباب العدالة والحرية بنقسم نفسنا لمجموعات وكنت مجموعة أسمها مجموعة الشهدا

ـ24 يناير فى اجتماع سكرتارية العدالة والحرية خالد السيد قافل الشبابيك طرد كل المشتبه فيهم م المقر وبيكتبلنا على ورق خطه التحرك

ـ24 يناير الخطة مجموعة هتتجمع فى ناهيا ودى هيبقو جاين خمسات من كذا مكان ودى مكانش معلن مكانها والمجموعة التانية مجموعة الشهدا

بالنسبة لمجموعة الشهدا دى كان فيها 10منهم أنا واسلام الزناتى ودول الى كانو هيتسلمو عند مصطفى محمود عشان مسيرة ناهيا تعدى

يوم 24 بليل وسام عطا وحليم حنيش يتقبض عليهم فى المطبعة

يوم 24 يناير يخرج وسام وحليم ويجو ع شقتى الى اطلق عليها فى ما بعد شقة الثورة وده هقول ليه ووسام كان جايلى بشبشب ‎:)

صباح يوم 25 السما صافية والقهوة الى تحت البيت مشغلة ياسين التهامى واسلام الزناتى فى الطريق جايلى ووسام ابتدى يتحرك هوا وحليم .. قمت استحميت وبما انى كنت عارف انى هيتقبض عليا لبست اقذر تيشيرت وبنطلون عندى وجالى اسلام الزناتى وأتحركنا قبل معادنا بربع ساعة .. أمى لأول مرة تتصل بيا وأنا نازل مظاهرة وتقولى ربنا هينصركو المرادى يا أبنى خلي بالك من نفسك

وصلت مصطفى محمود عند كنتاكى وكان المفروض مكلم المجموعة بتاعتى هقابلها هناك ولا واحد جه منهم ألا انا واسلام .. كان نجيب المصرى ومعاه مجموعة اصدقاء موجودين عند سلنترو جامعة الدول رحت خدتهم وقلت نروح عند الجامع ويتقبض علينا ونخلص  لقيت حوالى 500 واحد قدام مصطفى محمود بيهتفو بحراره ومتكردنين بس الكردون مفتوح من ورا دخلت انا والشباب جوا الكردون  أتقدمت انا واسلام لحد ما وصلنا فى وش العساكر والجلاله خدتنى وضربت عسكرى فوقع مفيش ثانية كان العساكر كلها بتقع زى قطع الدومينو مفيش عشر دقايق وال 500 بقو 5000 بيضربو اى عساكر تيجي فى وشهم ولما واحد قال مش عايزين احتكاك مع الامن خد نصيبه م الضرب وهتفت وقولت .. يا أهالينا انضمو لينا الداخلية بتعادينا

عرفنا نوصل للناس ان فى مسيرة جاية من بولاق وممكن الامن يعترضها ولازم نروح نساعدهم مشينا فى جامعة الدول وكان الهتاف الاكثر .. أنزل يا مصرى ..  وصلنا قبل فرغلى بشوية عند العمدة كدة ولمحنا المسيرة التانية جاية من ناهيا وعددها كبير لما لمحنا المسيرة التانية جاية فى الطريق جرينا عليهم وحسيت ان الناس بتدخل جوا بعض وفى لحظة الصفوف اتنظمت  وظهر المبدع دائما خالد السيد لما كانت الناس بتسأل هنروح على فين .. وهتف .. الى عايز التغير يجي معانا ع التحرير

منساش لحظة ما قابلت أصاحبى الى جاين فى مسيرة ناهيا بالعدد ده خدتهم كلهم بالحضن كانى كنت مسافر من 50 سنة لما شوفت سولافه وهيا لابسه الحطه الفلسطينى والتى شيرت الاسود والكوتش والى كانت مسمياهم طقم المظاهرات كنت حاسس بأمل لا يوصف دخلنا شارع البطل أحمد عبد العزيز وواحد شالنى وانا بهتف.. ولما شوفت العدد الى فى المسيرة سكت وعنيا دمعت وعيط بغباوة مشينا فى الشارع وقدام المصل واللقاح أحمد دومة اتاخد جوا عمارة ظابط كان منمر عليه .. بس دخلنا جبناه دخلنا شارع الدقى وساعتها عرفت انها ثورة لما شوفت اكتر من 30 واحد من عندنا من المنطقه ملهمش علاقة بالسياسة … قابلت اوكا وميدو وسبل ومحمود ومحمد فايز وللأسف محمد كامل واخرين من المنطقه عندنا ‎

أول كاردون قابلنا على كوبرى الجلاء .. العساكر دبت برجلها ع الكوبرى عشان تخوفنا .. دبينا برجلنا ع الكوبرى كنا هنوقع الكوبرى ببص جمبى لقيت سوكا ماسك عسكرى تحت باطه وبيضربة وسولافة بتشد عصاية من عسكرى امن مركزى وبتلوش بيها وانا تقريبا كنت فوق العساكر  وفجأة المسيرة بتوقع عساكر الامن على الارض وبتوس عليهم وانا معاهم بيتداس عليا بالعافية قومت وكملت فى المسيرة عدينا كوبرى الجلاء وجمب الأوبرا وقف الناس يصلو العصر أو المغرب مش فاكر ‎

كنا على كوبرى قصر النيل والميدان فى أشتباكات جرىنا وأذ بعربيات الميا بتغرقنا كان ساعتها جمبى سولافة قعدت تضحك وتتنط من الميا اول ما دخلت الميدان قابلت زمايلنا من تيار التجديد وفاكر هيثم جبر وهو بينط وبيصرخ ويقول ” الجماهير حلوة خالص  وأنسحب الأمن ناحية القصر العينى وابتدينا نرتب هنعمل ايه واجتماع كل نص ساعة فى الصنية ولجان اعاشة ودربكة

وابتدينا نهتف أعتصام اعتصام حتى يسقط النظام .. وبقينا نلف ع الناس ونحلفهم بكل الغالين محدش يروح والى كنت بقوله اوعى تروح كان بيبصلى وكانه عايز يقولى مش مستنيك انت الى تقولى على فكرة  جمعنا 7 الاف جنية من الميدان وروحنا نجيب بيهم أكل المهم الأمن خد مننا الاكل الكردون الى كان عند شارع طلعت حرب وضاعت الفلوس

الساعه وصلت 9 سولافة قالتلى انا لازم اروح دلوقتى حالا روحت انا ومحمد عواد نزلناها المترو وطلعنا خرج انا وعواد وكنا محتاجين نشرب قهوة روحت قهوة جمب الميدان جبنا كوبايتين قهوة ورجعنا ع الميدان تانى رجعت ع الميدان وكان فى زماليلنا جابو بطاطين المهم فرشت واحدة على رصيف الصنية ونمت وصحيت على قنبلة غاز بتنزل جمب وشى قمت ببص ع الناس لقيت الميدان ابيض فى ابيض ومش شايف حد فجريت ادور على حد اعرفه لقيت ايد ممدوده شديتها طلعت داليا موسى خرجت لقيت هيثم جبر ورضوان ادم ومروة ونهال بيجرو جريت معاهم وان بعيط مش من القنابل لا من قهرتى وكنت صعبان عليا الثورة تخلص كدة .. جريت فعرفت انهم هيروحو لانهم كانو تعبانين صعب عليا اروح سبتهم ورجعت ‎ وفى شارع طلعت حرب وانا بعيط بصوت عالى قابلت عواد وسمر سلامة ومن الناحية التانية مسيرة جاية من بعيد “الشعب يريد اسقاط النظام المسيرة كانت هتروح تلف فى شبرا تحمس الناس وتنزلهم الشارع تانى قررت انى مع الناس دى حي او ميت .. المسيرة وصلت عند نفق شبرا وببص جمبى لقيت عم كمال أبو عيطه أستغربت  .. الراجل ده ازاى مستحمل من الصبح لحد دلوقتى بس كانن تعبان اوى .. المهم واحنا فى النفق اتضرب النفق طوب قنابل مسيلة للدموع وكمال ابو عيطه مكانش قادر ياخد نفسه خدته انا وعواد وطلعناه من النفق واتقسمت المسيرة نصين .. نص دخل شبرا ونص رجع ناحية الاسعاف أنا كت ناحية الاسعاف .. وفى الوقت ده قابلت الحركة كلها العدالة والحرية …  كلهم كان صاعبان عليهم يسيبو حلمهم يضيع فكانو مكملين للأخر كان فى اللحظة دى عمرو جيفارا اتضرب بالنار فى رجله المهم كان المفروض ناخد ساعتين راحه عشان  … نعرف نكمل وعشان انا كان عندى امتحان كمان ساعتين فكان فى شقتى وشقة بدوى … قسمنا نفسنا جزئين كان معايا شوقى ووليد وحسين والمصرى وعواد وكان فى ناس تانين بس مكنتش فاكرهم وكان وليد مضروب فى رجله خرطوش

وصلنا البيت تقريبا شايلين وليد دخلنا بيتنا الشارع كله بيتفرج علينا وعلى منظر وليد والدم مغرق بنطلونه وانا وحسين ساندينه أتصلت بواحد صاحبى جابلى 3 علب كاتفلام فضيتهم كلهم فى ازايز حاجة ساقعة وكل واحد خد ازازة شربها ونام

وده كان يوم 25 بالنسبالى بكره هحكى عن 26 بالتفصيل تصبحو على خير ‎….

يوم26 الساعه 7 كنت نازل من البيت عندى أمتحان الساعة 9فى اكتوبر عدى عليا زميلى بالعربية خدنى من تحت البيت لانى مكنتش قادر اتحرك صاحبى ده عنده مكتب دعايا واعلان كان طابع 5 الاف بيان دعوة ل 28 وكانو فى العربية المهم وصلنا الجامعة وكان امتحان حقوق انسان قلت فى الامتحان ده اى كلام فى الدنيا غير الى فى المنهج ومضيت فى كل صفحة من تحت يسقط مبارك خلصت الامتحان فى تلت ساعة وعملت خناق وخرجت من اللجنة ووزعنا الورق فى كل اللجان وعلى الجامعة كلها

رجعت البيت كان كل الى بايتين عندى مشيو وعرفت ان الشقة كانت متراقبة وفى حملة اعتقالات فى المنطقة لكل النشطاء والاخوان دخلت البيت قلعت التيشيرت ابن عمتى اتصل بيا وقالى فى حكومة داخلة الشارع عندك خرجت بالشبشب والفانلة الحمالات على البيت الى ورانا خرجت من الشارع الى ورانا وكلت ابن عمتى جابلى تيشيرت وكلمت مصطفى شوقى كان بايت فى الزماللك فرحتله الزمالك خدنى وقعدنا نلف لفينا فى شوارع الزمالك اكتر من ساعة وكان المفروض فى اجتماع فى مركز الدراسات الاشتراكية الساعة 7 وكانت الساعة لسه 3 سولافة كلمتنى فى الوقت ده وكانت مصممة تجيلى وكانت فى وسط البلد فى عز ما كانت وسط البلد الى بيتشاف فيها بيتقبض علية … رحنا لجيهان شعبان البيت يوم 26 على الساعه 5 انا وشوقى وخالد السيد ودومة وكان فى كمية مخبرين متتوصفش وهناك عرفنا انا مركز الدرسات الاشتراكية متحاصر والى هيقرب من هناك بيتقبض عليه ‎، فتحنا قناة الجزيرة وشفت الى بيحصل وعرفت ان سمر سلامة ومديحة قرقر اتقبض عليهم من قدام النقابة وشوفت محمد عبد القدوس وهو بيتسحل ، وشوفت الكوتشات مولعة فى الشوارع واهالى بولاق بيتضرب عليهم قنابل فى بيوتهم من فوق كوبرى 15 مايو وكنت هنزل اموت نفسي واموت ظابط وكنت هنزل بس خالد اقنعنى ان الى بيحصل ده تجهيز ليوم 28 واننا لو هنموت او يتقبض علينا يبقى يوم الجمعة مش النهاردة لازم نفضل برا  … وكنت متابع اسكندرية و السويس من رصد والمقاومة الشعبية فى السويس والحكايات الغريبة الى كنت بسمعها عن الى بيحصل فى السويس

المهم قعدنا نلف طول اليوم على مكان نبات فيه لحد ما 12 بليل وصلت لحلوان وبيتنا عند حليم فى الشقة بيتنا اليوم ده عند حليم فى حلوان وكنت بتشل عشان الاحداث الى بتحصل وانا مش فيها ‎
خالد السيد قعد معانا وقالنا ان الداخلية بكرة هتتعامل معانا بالرصاص ولازم يبقى فى حاجة ندافع بيها عن نفسنا “الملوتوف”  وشى احمر وعنيا دمعت عشان عرفت ان هيقع ناس كتير بحبهم وهيموتو بكرة … بس كنت فرحان اننا الى هناخد تار ال 30 سنه الى فاتو حتى لو مت ومات كل الى اعرفهم

يوم 27 الصبح فى حلوان فى المشروع الأمريكي مفيش اى وسبلة اتصال بالعالم الخارجى عندنا اجتماع الساعه 6 خرج محمد ناجى جابلى سمك وقولنا لو اخر اكلة فى حياتنا لازم تبقى دسمة ونعيش اخر ساعات فى حياتنا متهنين وجبنا يوستفندى وبيبسى خلصنا وكان عندنا اجتماع فى مدينة فى شقة جمب معسكر الأمن المركزى … وتم تسمية الأجتماع ده فيما بعد بأجتماع الملوتوف

وفى الأجتماع ده أطرح أساليب الدفاع عن النفس زى كردنت الظباط وخطفهم والأرشادات الى جاتلنا من تونس زى الاسبراى وتعطيل المدرعات وأخيرا أطرح موضوع الملوتوف وأول ما أطرح كل الى فى الأجتماع وشهم أحمر وودانهم طلعت دخان وانا وخالد عبد الحميد كنا هنفطس م الضحك فى النهاية الناس أقتنعت ان يوم 28 يا قاتل يا مقتول وأتفقنا اننا مش هنستخدم اى وسيلة من دى الا لما الخصم يستخدم الرصاص الحى

ويوم 28 كنا كلنا هنتحرك من امبابة بس المجموعات كلها بتتقابل فى نقط بعيده عن بعض وبنتحرك على امبابة والى عارف رؤوس المجموعات بس وبعد ما خلص الاجتماع كنت مكلف انا وسوكا اننا نجيب الخوذ والجونتيات الحرارية من محلات الامن الصناعى فى العتبة نزلت انا وسوكا و محمد بدوى وبدوى روح ورحت اانا وسوكا العتبة .. المحلات كلها قافلة المخبرين فى كل حته فى وسط البلد مفيش عربيات امن مركزى ولا امن بلبسهم كان فى مخبرين بس ضربت فى دماغى انا وسوكا وقولنا هناكل حواوشى من عندى شلبى وعليا وعلى اعدائى روحنا عند شلبى كلنا الحواوشى وطلعنا هشام مبارك قبل اقتحامه بساعات والساعة واحدة جالنا واحد وخدنا بالعربية رجعنا مدينة نصر قعدنا فى عز الساقعة فى الشارع وكنا بنتكتك وكنا مستنين حد يجيبلنا مفتاح الشقة الى هنبات فيها وجالنا حوالى خمس تليفونات من بلاد عربية كانو بيرفعو من روحنا المعنوية تقريبا ‎

جاتلى مكالمة من واحدة من الامرات وقالتلى انا عارفة ان هيتقطع عليكو الأتصالات والنت ويمكن حياتكو تخلص كمان كام ساعة بس أحنا هنفضل طول عمرنا فاكرينكو لأن انتو الى بتحررو مصر والوطن العربى ربنا معاكو ويرحمكو لو استشهدتو أنا سمعتها وبكيت كتير أوى بعد المكالمة دى وجاتلنا مكالمة من مصرية عايشة فى امريكا وطول المكالمة بتعيط وتقولنا انتو هتموتو بكرة الله يلعن مبارك بعدها جه الى معاه مفتاح الشقة وطلعنا وطول الليل المكالمات شغاله من كل مكان فى مصر والعالم ونمت الساعه 6 الصبح صحيت 7ونص نزلت ومخبيش عليكم كنت خايف لأنى عارف اننا نازلين نموت .. بس نزلت وكنت هتجمع مع مجموعت فى شارع جامعة الدولة ونطلع على امبابة

يوم 28 بقى عايز يوم اعد احكى عليه وانا مش فاضى دلوقتى بس فى اقرب فرصة هكمل يوم 28 يناير واحلى يوم قضيته فى حياتى

يتبع ……… 

—————————————

 <<<< تابع بقيت الحكاوي 

حكاوي الميدان 1 .. مالك عدلي 

حكاوي الميدان 2 ..  حسام الصياد 

حكاوي الميدان .. 3

حكاوي الميدان .. 4 

أحكي حكايتك في الهاشتاج ده  ‎#ayameltahrir


Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s