حكاوي الميدان .. 4

marwa saleh

 ينفع اتفشخر بابويا بما انك جبت سيرة امبابه ؟؟ م.محمد صالح اللى اصر ان المسيرة تطلع من امبابه وتلفها كلها علشان الناس تشارك

 و محمد عبد العزيز و مها ابو بكر و الرفاق اللى كانوا فاتحين مكتبهم سبيل لاى حد عاوز يستريح او يدخل الحمام و ينزل تانى

زى مابنفتكرابطالنا اللى اول مرة تسمعوا عنهم افتكروا مايكل نبيل لان بغض النظر عن ارائه نزل و شارك..ووقوفك جنبه بقية الحدوتة

Eman Hashim 

امى الست المليانة الكبيرة اللى ركبها شايلاها بالعافية اللى مشيت حافية عشان ماستحملتش الجزمة من جامع رابعة فى م.نصر لحد غمرة

امى اما رجعت البيت السبت الصبح,قالت لى خالتك بتقول فى كتر ماتوا امى قالت لو ماتت تبقى زى اخواتها. والله العظيم

و عم فتحى دراكولا اللى من امبابة اللى عرفته يوم 29 بليل فى الميدان و هو من عجزه مش قادر يتكلم. و برضه بات معانا ماسابناش

ربنا يخلى لنا الحكومة.اخواتى يوم 28 مالقوش لا فيسبوك ولا موبايل و الريسيفر كله مظاهرات مصر,و المظاهرة جات لهم الشارع نزلوها ههههه

يوم 30يناير طول النهار مش عارفة ادوس ع رجلى امينة فضلت ساندانى لحد هشام مبارك اخدت حقنة و نمت على حجرها هناك

و كل ليلة كنت امدد ع الاسفلت بجسمى كله و ماكانش فى حد بيبص لى اصلا. و لو قلت عايزة الحمام الاقى تلاتة ماعرفهمش يوصلونى للبستان

 Mohamed Mokhtar  

 انا فخور اني مصري يا مالك عشان مشيت علي الارض اللي مشي عليها شباب زي دول و شربت من ميتهم و عشت معاهم

Ahmed Abd El-Fatah

وانا نفسي احكي عن محمد فتحي الي شغال فالامارات وجه مصر يشارك فالثورة وبينزل فكل مليونية يشارك ويرجع تاني

 او ممكن احكي عن ابراهيم صاحبي وهب نفسه فالثورة لحماية الميدان ولف محافظات مصر كلها فالثورة يشجع الناس ولما اكتئب هاجر السعودية

 وفيه شاب اخوه مات قدامه ف معركه الجمل ع كوبري قصر النيل وموطاش شاله غير بعد الضزب ماخلص يااه قلبت علينا المواجع

Sara Alsherif 

فى قصص كتيرة فى الثورة دى كل واحد منا يعرفها لسه متحكتش .الناس بتبدأ تحكى لما تبدأ تبص على اللى عملته احنا لسه مخرجناش من الدوامة

 وانا عايزة اتكلم عن صيدلى جنبنا بسأل عليه وصيدلته قافلة علظول عرفت انه اتقبض عليه عشان كان هو منسق التظاهرات ف المنطقة

وكمان عايزة اتكلم عن اختى اللى مكنش ليها ف حاجة وجريت ورايا يوم28 عشان متخلينيش انزل وحضرت اليوم معايا ف الشارع ومكنتش عايزة تروح

يوم 25 اللى جاى حروح للراجل صاحب كشك ف الجيزة اللى ادانا الكوكاكولا ومرضاش ياخد مننا تمنها

علاء سيف عملى صدمة نفسية قبل الثورة وبعد ما بدأت عارفة انه ف جنوب افريقيا فجأة يوم موقعة الجمل لقيته ف الميدان لسه جاى من المطار

عايزة اتكلم عن دينا صاحبتنا اللى فرحها كان 28 يناير وكانوا خايفيين عمها يعيا قبل الفرح عمها كان كويس والثورة قامت يوم فرحها

عايزة اتكلم عن المصريين اللى الدنيا كلها كانت بتسيب بلدنا وهما باتوا فى المطار 3 ايام عشان يعرفوا يرجعوا لبلدهم وقت الثورة

عايزة اتكلم عن اطفال الشارع حبسوهم فى قسم قصرالنيل قبل 25 وقوللهم ممكن نسيبكوا ومنخدكمش تانى لو ضربتوا العيال اللى بره ومرضيوش

 نفسى اعرف اشكر االكوافير والصيدلية وبتاع السوبرجيت ف الجيزة اللى كنت بكلم اهلى منهم كل شوية اطمنهم اننا لسه عايشيين

امى بعدماكانت ضد نزولى يوم11فبراير كانت حتنزل ولما لقيتنا كلنا نازليين قالت اناهقعد بابنك عشان لو جرالك حاجة يلاقى اللى يربيه

 Muحmad BarakaT

 انا افتكرت واحد اعرفه من حوش عيسى اسمه يحيى راح القاهره مخصوص و استشهد في موقعة الجمل

 معاذ اللي عنده 13‏ سنة و اخد رصاصه في عينه يوم ‏28‏ و لسه بيشارك لحد دلوقتي

 اسلام 16‏ سنة ف اعتصام سعد زغلول ‏يوم ‏23 يوليو اتضرب و بديله حقنه مسكنة اول ما سمع كلمة بلطجية راح جري يدافع مع الناس

عم محمد السيد محارب و مصاب ف حرب اكتوبر و راح القاهرة يشارك أخد رصاصة قناص في كتفه طلعت م الناحية التانية

abdo ali mossa

اهل المطرية اللى حرقوا كل عربيات الامن المركزى و امن الدولة وجروا الظباط و العساكر قالعين و كل دا فى 3 ساعات بس

Mohamed Kassem

أنا عايز احكيلك عن عبد الرحمن 12 سنة كنا ضيوفه في الميدان عشان بقاله 3 سنين عايش فيه وماكنشي عايز حسني يمشي عشان احنا مانمشيش

وعن شريف درويش اللي فضل يضرب في الأمن المركزي في القائد إبراهيم لحد ما جريوا بعد 3 ساعات وفضل ينزل كل المليونيات لحد ما سقط

 Shady Eladl

شاب قابلني في معروف ومعاه عيش وأنا مش لاقي عيش اداني شنطة مليانة ولما اديته فلوس قالي عيب احنا مصريين

 قابلت بنت في الميدان رجعت من ألمانيا بعد ما استقرت هناك ولما سألتها قالت بحرر بلدي

أنا ما بنساش ال3 شباب اللي ماتوا فوق وتحت كوبري اكتوبر قدام عيني يوم الجمل باليل

مهاب الجوادي

كان فيه ولد عنده بتاع 16 يوم الجمل كان يفضل واقف يراقب و بعدين يرمئ الطوبة تجيب واحد الأرض كان أقوى من القناصة بتوعهم ‎:)‏)

ayman khattab

سواق تاكسي من طنطا 22 سنه يوم موقعة الجمل سافر للميدان بمطوى عشان يتصدى للبلطجيه اقنعته يرمي المطوى عشان ميفتكروش بلطجي

Ahmed Abd Elbadie3

انا مشيت عشر ساعت على رجلى من عين شمس للتحرير و انا عامل عمليتين فى رجلى و مبقدرش امشى اكتر من نص ساعه على بعض

Louay El Sharkawy

أولادي سمير وأحمدالشرقاوي رجعوا من جامعتهم في فرنسا يوم 22ينايرعلشان يشاركوا في الثورة من أول يوم لغاية ما مبارك تنحي.فخوربهم

يوم 29 كنت في المستشفى باستقبل الجرحى والشهداء و بادور على ولادي وسطهم لأني عارف انهم معاهم و مش قادر أكلمهم واطمن عليهم

 حتى أبويا اللي عمره 75 سنة شارك في الثورة لما نزل يوم 7فبراير ليؤسس مع زملائه وتلاميذه المجموعة القانونية لاسترداد ثروة مصر

يوم 29 قمت باستخراج خرز من وجه و يدي شاب اسمه محمود بمخدر موضعي و فور الانتهاء من الجراحة وقف وقال لي أنا راجع الميدان

 الثورة دي شارك فيها 3أجيال أحلامهم اتدفنت 60 سنة. أوعوا تفرطوا فيها

Hisham Youssry

 يوم 28 كوبري قصر النيل ولد ماسك ازازة مولوتوف نسف بيها عربية امن مركزي ادام عيني مش هنسي المنظر ده

 يوم موقعة الجمل معرفتش ادخل الميدان بسبب ظابط جيش علي الكوبري رفع سلاحه و منعني ادخل

من المشاهد الملحمية يوم 28 يناير بليل مسكوا ظابط و فشـ…  ضرب و فجأة الناس قعدت تهتف مصري مصري فسابوه يمشي

لما صحيت كان مفيش اتصالات نزلت ادور علي الناس في الشارع مش لاقي حد رجعت البيت لاقيت الناس داخلة من شارعنا /العجوزة 28 يناير

Amany Sadek

 كان فى نقص أدويه أول كام يوم أول مالنت رجع ليلة2/2المصريين بره وجوه مصر إتصلوا وبعتوا دوا ملا المستشفى الميدانى ومخزنين فى3أيام

كان شباب صغير كتير يدخل شايل مصاب ويطلع اللى داخل ماشى مصاب أكتر أو واخد رصاصه ويفضل ساكت عشان صاحبه يتعالج الأول

Tarek El Sheemy

 ضربت المقدم ايمن السمان بقسم الرمل بالميجا فون يوم 28

 hossam totti 

يوم 25 وانا نازل المظاهرات وكل اللى اعرفهم سابونى وخلعوا وكنت ماشى جنب الناس وكأنهم كل اهلى وصحابى

esraa fathy

اول مره نزلت التحريرأما رجعت ماما زعلت وقالتلى برضه نزلتى قلتلها واشمعنى كل اللى ماتواواتصابودول ملهمش اهل يعنى سكتت وبقت تسيبنى

vantesht 

 فيه امام فى اسكندريه فى منطقة القبارى خطب يوم جمعة الغضب وحث الناس على الخروج واستشهد بطلقه فى الراس ممكن ابقى اجيب لك اسمه

mohamed abo-elgheit

واحد صاحبي يوم اقتحام امن الدولة قبل ما ينزل افتكر انه مصلاش العشا فرجع من على الباب صلى ودعا في سجوده: اللهم ارزقني الشهادة

 لما اعتقلت يوم 26 كان معانا ولد في أولى ثانوي رااجل . الظابط مسكه من شعره وهو بيضربه وبيقوله:عاملي فيها شاكيرا والواد ولا اتهز

لما اتعرضنا على النيابة يوم 27 العسكري اللي معايا في الكلبش قالي: انتو رجاله . انا عايز اقلع الميري وابقى معاكو

 سمعه عسكري تاني، قاله انت خايف ياض تجول بصوت عالي انك معاهم؟ طاب عليا الطلاج مصر كلها معاهم . ساعتها عرفت اننا في ثورة بجد

نزلنا مظاهرة مجهولة تماما في أسيوط.29 ولد و 8 بنات و 3 ستات.اعتقلو المظاهرة كلها! .البنات طلعو من القسم واحنا ودونا معسكرات الامن

Momen El-Husseiny

 يوم 16 يناير إتقبض عليا أمن دولة عشان كنت بعمل بحث علمي للتطوير العشوائيات مابين مصر القديمه ونهر النيل! قلولي علم إيه وهباب إيه

 أينعم مقعدتش كتير في أمن الدوله إلا إن الإهانات اللي حصلتلي أعدتني كويس للثورة. يوم 25يناير حلقت دقني ولبست كويس عشان أستشهد نزلت

ShadwaAlaa

 عمري مهنسى طفل الي مرداش يقوم ياكل و فضل قاعد معايا اكملوا بقيت الحروف اعلمهالوا‏ في المدرسه الكانت معموله قدام الجامعه الامريكيه

Sameh Ragheb

ولاعمري هاغسل الأندرشيرت بتاع يوم 28 اللي اتملى دم من كترالنزف لدرجة إني أغم عليا قبل الفجر و أصحابي فضلوا جنبي لحد ما فقت الصبح

 و لحد دلوقتي ما شلتش الخرطوش اللي مالي جسمي حتى اللي في قورتي سايبها – مش ها شيلهم غير أما الثورة تكمل

ولاهانسى المعركة مع البلطجية يوم 2 فبراير في الشارع اللي جنب الجامعة الأمريكية – من ساعتها حاسس إن الشارع ده بتاعي – 6 ساعات قتال

Ahmad M. Assal

معرفتش أنزل التحرير من أول أيام الثورة…ومعشتش أجواء الثورة إلا متأخر.ومن ساعتها وانا بدور على حدث حقيقي اعيشه….حاسس بالعار

والله بأنزل التحرير كل ماقدر على أمل إني أقدر أرد جميل الناس دي. واعواد إني منزلتش من الأول, بس واضح إني مش مكتوبلي.يا رب سامحني

 جناب الكومندا المهم® 

 بعد ماشوفتش ال حصل ف 28يناير بدأت أتجرأ وأقول هنزل،‏ أتخانقت مع ماما وقولتلها أنا مش أحسن م ال ماتوا

 بعد موقعة الجمل نزلت لقيت بلطجية بسكاكين واقفين مع لوا شرطة بيخطفو الأكل من أي حد معدي وداخل التحرير ويمنعو يدخل

 ف يوم كنت خايفة لسه وبس عايزة أنزل فا نزلت أتبرع بدمي ف القصر العيني عشان أحس إني عملت أي حاجة

Mostafa Al Sayed

عسكرى الامن المركزى اللى هربنى بعد ما اتمسكت يوم 26 و قالى انا هاعمل نفسى باجرى وراك و انت اهرب و هربت و يمكن هوه اتجازى بسببى

يوم 28 لما راجل عزم عليا بحبايتين فراولة عشان اجمد قلبي و اضرب الظباط و بعد شوية لقيت الراجل ده مضروب ف رجليه و اتنين شايلينه

Moustafa Ahmed Nour

مش هنسي ليلة 27 بليل ف شارع المدينة المنورة فالسويس لما مدرعة الأمن المركزي ضربت نار علي شاب .. من قوة الطلقة الشاب إتنطر 2 متر

يوم 27 فالأربعين نزلت أستقبل واحد صاحبي جاي من الإسماعيلية لقيتو نازل من ميكروباص والميكروباص بيدخن قولتلو إيه قالي القنبلة جوا‎ 🙂

Haitham kamal 

معرفتش انزل يوم ٢٥ علشان اتمنعت بالقوه نزلت يوم ٢٨ و مشيت من القلعه للتحرير علشان اساند اخواتي اللي بيموتوا

 شوفت حاجات كتير كتبت في وجداني حب تراب البلد دي و الناس اللي قسمت معاها الاكل و انا اول مره اشوفهم بقيت مصري بجد مش بالصفه

 كنت بنزل الميدان كل يوم و اروح ادعي اني اموت شهيد و من يوم ١٢ فبراير مروحتش الا الجمعه اللي فاتت كنت مفتقد المكان و عيطت

ساعه خبر التنحي وقفت ارقص مع الناس و احضنهم و انا معرفهمش كنت بعيط من الفرحه مع ان قبلها بيوم كنت محبط اوي

 eman saad

يوم 25الظهر بنت قعدت تقول هنيجي تاني يوم الانتخابات أوعو تنسوا راجل بسيط أوي زينا قالها مش هنمشي أنا هتقتل هنا‎‎

 amany salaheldin

 لن انسي لحظة تنحي مبارك في ميدان التحرير والناس بتصلي

قبلت بنت في التحريرعمرها حوالي 15 سنه لما كنت احاول أأكلها اي حاجه كانت بتقولي لأ انا عاوزة اهتف لحد متنحي مبارك

انا فضلت حتي بعد مافضوا التحرير بروح كل يوم علشان كنت بفتقد المكان والناس اللي فيه

كان عندي امل ان ميدان التحرير يفضل والناس اللي برة الميدان تبقي زي الناس اللي جواه

كنت بنزل التحرير من ورا اهلى ودى اول مره اعملها لما شفت الناس كان نفسى ابوس تراب الميدان اللى جمعنا وظهر احلى حاجه فينا

صحبتى من قطر قالت لى يوم 24 الجيش هينزل ماتنزليش بكره قولت لها خليها ع الله تونس بقت حره ومصر مش اقل منها

كنت بحلم بالثوره من وانا ف اعدادى بس خيالى كان محدود زى ثوره 52 كدا الجيش ينقلب واحنا نؤيده ..كان كل حلمى نفشل مخطط التوريث

rafeeq

يوم 25 كان أول علاقتى بالمسيل للدموع فى الميدان..يوم 28 كان الغاز بالنسبة لى دلع وفككان ‎:)‏

يوم 28 كنت فى مسيرة طالعة من مصطفى محمود كنت قبل الصلاة حاسس إنى باترعش وخفت أول ما الناس هتفت الشعب يريد لقيتنى فى الصفوف الأولى

Sohip Saad

أمي وانا نازل أنا واخويا يوم موقعة الجمل كانت متأكدة إننا مش راجعين تاني وقالتلنا انووا الشهادة بقا . بس الطريق كان مقفول ورجعنا

khaled elbayoki

يوم 28 قدام كوبرى قصر النيل ضابط ضرب اللى جنبى بالنار و هرب و الناس جريت عليه و ممسكتوش

يوم 25 منزلتش و يوم 27 كانت اول مره فى حياتى انزل مظاهره يوم 28 كنت بصلى فى جامع قسم الدقى و خرجت من هناك

آنسة حنفي

يوم التنحي في إسكندرية الناس كانت بتصلي في بحري والإمام كان بيدعي سمعوا الخبر مكانوش عارفين يطلعوا من الصلاة و لايكملوا من الفرحة

مروحتش التحريرإلاصلاةالعيداللي فاتت وكان جسمي بيقشعر لماافتكر كل اللي شفته عالتليفزيون عمري ماححس اللي حستوه ولاحتحسوا اللي حسيته

mohamed khedr

مش هنسي يوم28 خطيب مصطفي محمود كان جامد وكان مع ثورتنا في الاول بس وضحكنا لما قال كله يقفل موبيلاته كله ضحك عشان اصلا مافيش شبكة

Hesham Esmail

في شارع الاقبال حصل اتحدف علينا شوكولاتة كمان ‏ بس دة كان بعد ما الشرطة روحت خلاص والأقسام بدأت تولع

مش هنسى معركتنا مع الأمن المركزي والكر والفر من القائد إبراهيم لشارع شامبليون ف 3 ساعات اسكندرية كانت بتلعب بعربيات الأمن المركزي

Marwa Khalil

ليلة 25 بعد بيان الداخليه البشع مصريه في لندن ارسلت على الفيسبوك تقول لنا ننزل على طهارة ردوا عليها احنا ساعتها مش حنحتاج غسل

كل ما المجلس يصدر بيان من إياهم اتذكر بيان الداخلية لو كنا خفنا منه يبقى نخاف دلوقت.. بعد كل اللي شوفناه أو سمعنا عنه الخوف انتهى

على العكس من ناس كتير تمنت الشهادة أنا حبيت الحياة فجأه في الأيام دي وكنت باتمنى أعيش عشان أكمل المشوار وأشارك وأشوف مصر أحلى

نزلت يوم 25 وكمان 26 و27 كانوا فاكرين في البيت إني باروح الشغل لكن بعد 28 يناير مكانش ممكن الموضوع يستخبى واتحبست بعدها يومين

 شاركت في اللجان الشعبية 29 و30 يناير كانت فتره مرعبه ومن 1 فبراير رجعت الميدان كنت باحس فيه كأن الهوا مختلف والدنيا حاجه تانيه

waleed reda

هعترف و الامر لله انا و اخويا شاركنا لما امى زعقت لنا يوم 25 عشان نروح نجيب اخواتى البنات من قدام دار الحكمة

 Mohamed Salah 

أنا اعدت 3 ايام نايم , ونزلت يوم 28 الساعه 2 بليل وكنت مبهور من منظر الدبابه وهي مكتوب عليها مبارك باطل بس نفسي الأيام دي ترجع ‎:(‏

roosha 

واحد جارنا قال لبابا انت ازاى سبتها تنزل مخوفتش عليها قالوا هى مش احسن من الى ماتوا

 ايهاب و فهد 19 سنة و 21 سنة كانوا كل يوم فى الميدان و لما بابهم فى يوم بيقلهم احموا معايا البيت قالولو ميتحرق البيت المهم مصر

Mahmoud j El-3abdeen

لحظة التنحى انا كنت ساجد فى مسجد ف بحرى وكنت متاخر ركعة ف الصلاة .. ف اخر سجدة ليا كنت بدعى انه يتنحى المسجد اتهز بيا ساعتها

Mahmoud Rashad ZORO

حد اتصل بمني الشاذلي في الثورةمن اسكندرية وقالها علي ولد كان معة13 سنة وقالة انه خايف انهم يموتوا قالة ما يخافش بعدها جاتلةرصاصة

Vanvuna

حلوة حكايات الثورة حتى أبسطها،مش هنسى الست اللي قالتلي انا ساكنة هنا والقنابل دخلت بيتي والتليفزيون المصري بيطبخ كبدة، نزلت معاكم

 بعد “لم أكن أنتوي” كنت روحت لقيت ناس غيرت موقفها وناس تأثرت، قفشت وصرخت في البلكونة قلت بكرة هتحصل مجزرة ويقول قتلوا بعض وقد كان

موقعة الجمل: كلام عن الفراغ الدستوري والبلد بتولع، كل اللي كان ف بالي المجزرة، قررت أبتعد عن السفسطة السياسية وانزل اوصل الأدوية

موقعة الجمل: كلمت ناس كتير لحد انهاردة معرفهمش لكن كلنا تواصلنا وكان فيه تعاون وتنظيم تلقائي غريب عشان نجمع الأدوات الطبية والأكل

 جمعنا الحاجة ونزلت مع صاحبتي، بنتين لوحدنا في العربية ومعانا كم أدوية ومستلزمات طبية وعند كوبري الجلاء شفنا بلطجية كتير ..يتبع

معرفش ازاي عديت من وسط الميدان بسرعة ووصلنا قصر النيل ودخلنا الحاجة للميدان ورجعنا من على كوبري أكتوبر عكسي والبلطجية بيتجمعوا

ثلاث عيال متشردين شافوا شاب بينضف قالوا له ياعم احنا جايين مظاهرة ولا هننضف قاللهم هنضفها من فوقها لتحتها، ابتسموا وبدأوا يساعدوه

Hany Albeshry 

 كنت بافضل خايف وأنا في طريقي للميدان لحد ما أوصل فيروح كل الخوف

طب حد فاكر الطابور الطوييييل بتاع توم آند بصل…هههههههه

Ahmed Abd Elbadie3 

يوم 25 كنا فى ميدان المطريه حوالى 200 واحد و متركدنين باضعاف عددنا و كسرنا الكردون و بقيت حرب شوارع و مشيت لوحدى للتحرير

و انا ماشى قابلت 4 من اللى كانو معايا و وصلنا لحد التحرير و الضرب شغال غاز و ميا و فضلنا قاعدين كان عندى امتحان بعدها بيوم وممشتش

 Mohammed ElSebaei  

يوم 26 في المنصورة كنا 20 واحد وكان في عشر عربيات امن مركزي خدنا العلقة المتينة واعتقل مننا خمسة

Mohamed sa3eed

يوم 25 كنا من اوئل الناس عند نقابة الصحفيين وشفت بعينى عمرو سلامة وامن الدولة بيضربه واتقبض عليا الساعة 2

Yasmeen Moخtar 

 يوم موقعة الجمل و هما رايحين الميدان بالجمال علي كوبري علي 15 مايوالناس كانت فاكراهم رايحين يشاركوا و قعدت تحييهم من الشبابيك

عيطت اول مره سمعت فيها بحبك يا بلادي مع صور الشهداء ‎:)‏

مكن انا برا مصر غصب عني لدراستي , لكن بجد بسبب الايام دي عرفت انا بحب الشعب دا و البلد دي قد ايه !

paul zaher 

 كان نفسى قوى اروح التحرير يوم 25 بس طلعوا عامليين كمين عند روكسى واضرابنا بس بعد كدة بقينا بنمشى مجموعات قليلة

الواد العسكرى بتاع الدبابة كان بيلف اول الشارع وطلع على الرصيف والظابط ادهملوا ‎

 Mayada Mostafa

احلي 18 يوم ف تاريخ البلد دي احنا عرفنا بعض فعلا فيهم يا ريتهم داموا ‎

 كنت بنزل من وراهم ف البيت و افهمهم ان شغلي ماشي حتي ف الحظر و اروح اقضي النهار هناك

أي حد من اصحابي رايح بليل كنت اجيب ادوية و ابعتهم معاه عشان مكنتش بعرف اروح بليل

Ahmed  Anwarr 

يوم 25 كنا اقل من 200 ادام دار القضاء الساعه 12 الضهر قعدنا نهتف لحد الساعه 1 ونص وصممنا نكسر الكردون ونطلع نمشى فى الشارع

واتحركنا فى الشارع بموازه نقابه المحامين واحنا بنهتف يااهالينا انضمو لينا .. وهتاف عيش حريه عداله اجتماعيه بيرج الشارع

بدأ الامن المركزى وظباط امن الدوله يمنعو الناس من على الرصيف انهم تنزل تنضم لينا وخلوهم يمشو مش يتفرجو فى ناس رفضت ونزلت معانا

بدأت الناس تنضم لينا بكميات كبيره واحنا بنهتف عيش حريه عداله اجتماعيه .. وقالولنا عالتحرير لان الامن المركزى قفل كل الشوراع

واحنا فى اتجاهنا للميدان كان الامن المركزى بيضرب فينا ويعمل كردون علشان يمنعنا من الاستمرار للامام

  Mohamed Mossad 

اوحش حاجة يوم الجمل كنت داخل الميدان من على أكتوبر و البلطجية بعد لما اتضربوا كانوا بيجروا ناحيتى و كانت معايا مراتى

يوم. التلات أول مليونية شفت عبد الحليم قنديل قلت أسلم علية و أنا معرفوش لقيتة هبدنى حضن و كان متأثر و كانى ابنة و كنت تأية منه

أول مرة فى حياتى اشترى علم مصر

عرفت طريق كل الأفران بتاعة الفينو اللى فى التوفيقية

ali hassan 

 عمري ماهنسى عياطي من الفرحة لما اتنحى وكنت لسه واصل القصر…والله لحد دلوقتي عيني بتدمع لما أفتكر

لما يتصل بيك واحد صاحبك قبل التنحي ب4أيام يقولك كفاية كداعشان عايزيخرج مع صاحبته وماتموتش بالسكتة القلبية يبقا دي بركة الميدان

 أول مرة فى حياتى اشترى علم مصر

عرفت طريق كل الأفران بتاعة الفينو اللى فى التوفيقية

كلت كمية بلح و بقسماط مكلتهمش فى حياتى

marmarina 

 يوم 25 يناير الساعه2 بليل يعد صضرب الميدان رجعت المستشفي و هناك امن المستشفي بلغوا عننا و امن الدوله جالنا المستشفي

 كنت بقول لاهلي اني نباتشيه عشان ابات ف الميدان و رغم اني كنت في الشارع بس كنت بحس بدفا غريب كنت حاسه ان كل الميدان اخواتي

pola salem

انا كنت مصدق معظم الاشعات وخصوصا اشاعة كنتاكى …فكوكوا بقى والله واحد صاحبى كلمنى وقالى طيب ماتيجى نروح ناكل

كنت كاتب ستاتيوس ع الفيس بقول بكل الحب بحترمك يا ريس …احا عليا بجد

لاقيت المذيعة بت الكلب بتقول ع القناة الاولى .احمى نفسك على كل مصرى ان يحمى نفسه .امى لاقيتها بتصوت وكلمت القنصلية علشان نسافر

 الموظفين فى القنصلية اليونانية قالوا لأمى يا مدام انتوا عندكم لجان شعبية يعنى أأمن من عندنا هنا ده احنا اللى نيجى نتحما عندكم

salah samak 

عيطت لما لقيت ناس متعاطفه مع مبارك و قعدت ازعقلهم و انا باعيط و اقولهم احنا الاقوي ده مالوش عهد و لا امان ، وفضلوا يشتموني

كنت بابص للناس بنظره مختلفه ، كنت شايف ناس بتصنع تاريخ ، كان نفسي اخدهم كلهم بالحضن

افتكرت واحد جنبي وطي ياخد قنبلة الغاز من الارض عشان يحدفها ع العساكر تاني نزلت علي دماغه واحده تانيه ومات ، الله يرحمك يا شهيد

 asmaa mohamed 

 بزعل اوي لما بتختذلو الثورة في الي حصل في التحرير بس مع ان الي حصل في اسكندريه والسويس كاناكثر قسوة وأثارة وللعلم

لعلم الجميع العدد الي نزل في اسكندريه كا اكثر بكثير من عدد المتظاهرين في القاهرة حتي جمعه 30/9 نزل حوالي نص مليون في اليكس

جوزي شاف منظر عربيات الامن المركزي علي الجزير علي كوبري قصر النيل لقيته لبس الترنج ونزل يوم 28 مع اني عندي 3 اطفال بس مخفتش

مع اني عندي 3 اطفال كان ممكن ينزل ميرجعش وولادي يتيتمو بس بالعكس شجعته وقلتله انزل واديته بصل بعد كده قلت ايه الي عملته ده

قلت ده ممكن يجراله حاجه وولادي يتيتمو وهما لسه اطفال ورجع عشان اتخنق من الغاز الناس رجعته شويه ولقيته نزل تاني ومرجعش غير  لما انتصرنا وعربيات الامن المركزي انسحبت من العجمي كلها

basma kafrawy 

 زى ماقلتلكوا معرفتش اشارك عشان العاءله بس خالى كان هناك اسبوع وكنا بنكلمه نقشعر ونقفل وادالنا ارقام ناس ميعرفهوش حتى عشان نطمن

خالى وهو هناك كان بايت عالرصيف طول الاسبوع اللى قضاه وكان بيشحن الموبيل فبيت واحد مالثوار اللى هو نفسه ميعرفهوش !!

mohamed abd elsameea

مش هنسى يوم 28 مسيرة مصطفى محمود لحد الميدان والى قابلناه فيها..مش هنسى مستشفى الشرطه لما كانوا بيرمولنا كمامات

 كان احمد عرابى وجامعة الدول ملاعب كوره ! تخيلوا ‎

 مش عارف ليه فرحنا بنزول الدبابات مع ان كان دورهم سلبى جدااااااااااا وكنا بنتضرب قدامهم عادى

هفضل ندمان طول حياتى انى منزلتش 2 و3 فبراير

Eslam Mohamed 

 مش هنسى لما كنا بنقرأ قرأن وخصوصا وجعلنا من بين ايديهم سدا ومن خلفهم سدا عشان بس كان معانا اكل ومياة وباين اننا رايحين التحرير

الرايق 

 كانو اهلى كل شوية يكلمونى انت فين …..انا بلعب بلاى ستيشن وانا فى الميدان ‎

كل يوم ارجع مترب وطالع عينى ..امى تقولى انت كنت فى التحرير صح ….اقولها لا تقولى ابنى مبيكدبش اقولها ..مشكلتى انك فهمانى صح

كنت بسمع كلمة بيقولك كتير وكان نفسى اعرف مين بيقولك ده عشان اقطع رقبتو ‎

 Iman Badawi 

 يوم الجمل كنت عند قصر النيل وباقى الوقت فالمتحف وسط المولوتوف والرصاص العيال كلمونى ياماما فيه حرامى فوق السطح ‎:)‏

قلتلهم انتم والجيران ظبطوة وفعلا اتظبط ونط وهرب ‎:)‏

 mohammed mahmoud

ال18يوم كنت بلف في التحرير كله أبص ف وشوش الناس وافعالهم في ذهول مش مصدق إن المصريين كده..حسيت إني في الجنه ياريتني ماكنت رجعت

 Amr Abdel Dayem 

بعد الخطاب التانى وانا راجع قابت 4 مظاهرات تاييد لمبارك وكل مظاهرة الناس اللى فى اللجان الشعبية تخبينا ونخبى علم مصر

شفت ناس كتيير كان نفسى اخد تليفوناتهم عشان افض اعرف اجدع وانظف ناس فى مصر

كنت حاسس ان الهوا نضيف وان انا طاير بجد

ساعة التنحى سجدت لله شكر وحسيت ان فيه هم انزاح وان البلد تستاهل اننا نعمر فيها مش نلعنها

 Wessam S.Rasmy 

أيام الشجن.. أبويا لما سمع التنحى قعد يعيط ويقول الحمد لله

 كنت بروح البيت وأنا ببص فى عيون الناس عمال أدور عالفرحة فيها كنت بحسها فى عين الغلابة والغنى والفقير

يوم الجمعة كان عليا شغل صليت ورحت شغلى فى العباسية وأنا داخل الشركة لقيت سلاسل بشرية من الأمن المركزى.قلت حلو قوى

Hossam Hosny

يوم 28 جيه لواء ومعاه 50 بلطجي عند مول طلعت حرب وقال انا هسيب الللي عايز يروح انما اللي هيقعد هيموت هنا مكانه طبعا 3/4 روحوا

IM sultan

أنا كنت مقضى أيام الثورة فى مظاهرات المنصورة وأسود يوم مر علينا يوم معركة الجمل مكناش عرفنا واحنا فى الشارع ايه اللى  بيحصل فى التحرير

وكان عددنا فى إلمنصورة قليل وبلطجية الوطننى منتظرين عند المحافظة والأمن المركزئ قافل شارع العباسي

واحنا كنا فى الطريق يا أما أمن مركزئ يا أما بلطجية الوطنى صلينا العصر فى الجمعية الشرعية وغيرنا المسار لميدان المحطة وربنا ستر

ايام الثورة كانت من اكتر أيام حياتى توتر وقلق وبتتغير المشاعر كذا مره فى اليوم لكن فى المجمل كنت فرحان جدا بأهلنا المصريين

mohammed shalabov

يوم 28 يناير مشييت من ميدان التحرير على ساعة 9 تقريبا وروحت ونزلت تانى الساعة 3 الفجر بهدوم البيت و ( شبشب الحمام ) ايام

safaa gomaa 

 اصعب موقف لما كنت ببقا نازله و ابوس ولادى و جوايا يقين انى مش هرجع و لا هشوفهم تانى

 يوم جمعه الغضب لما كنا فى ميدان فينى و كل ما نيأس نلاقى الاف جايه تدعمنا احساس روعه كأنك بتغرق و جالك منقذ

اجمل موقف لما لقيت بواب عمارة غلبان رافع ديل جلابيته و حاطط كانز بيبسى و بيوزع علينا عشان نغسل وشنا من دخان القنابل

قابلت ست عجوزة كانت ماشيه يوم 28 ومعاها كيس الدوا بتاعها و كل ما نقولها استريحى تقول أنا بينى و بينه تار موت جوزى و عيا ولادى

Kareem Farid 

يوم 25 يناير لقيت راجل بتاع بلالين واستغربت جدا انه جاي في الوقت ده الميدان يبيع مثلا, تاني يوم لقيته ماشي معايا في مسيرة

أويس 

بوقف تاكسي بعد خطاب الريس بتاع عاوز اموت في مصر ده بقول له التحرير قال لي يلعن ابوكوا وﻻد كلب وسابني ومشي

وهما بيفضوا الاعتصام شفتهم بيطلعوا غسالات…كانوا قربوا يستقلوا بالميدان

مشفتش خناقات

كنت بحس ان الارض طاهره

yusra salama 

 الميدان روحته يوم واحد لسة جسمى بيقشعر لما بفتكره..رحت مع امى اللى لسة بتحب الريس

 يوم 28 يناير كنت فى طريق اسماعيلية..ولما وصلت شفنا امن الدولة بتاع السويس بيولع

كنت بعيد عن البيت ومسافرة بعد 28 يناير..ومفيش نت وبتابع من التلفزيون..كنت حاسة ان يوم القيامة هيقرب

سمعت صويت وانا فى الفندق ان فى بلطجية وساعتها استشهدت ..وولحظة صعب انساها

 اعتقد ان امن مكان فى مصر وقت الثورة هو ميدان التحرير.الخوف كان مالى باقية ارجاء البلاد

amr ahmad 

بعد خطاب المخلوع المؤثر كنت ف المدان كلاصحابي اتصلوا شتموني وأمي اتصلت قالتلي متصدقوش ابن الكلب ده

ٳ ن ﭺج ي … 

كنت أصحي أول كلمة أقولها : مشي ولا لسة ؟ لسة ، الله يخربيته طب الأعداد في التحرير إيه ‎:D:D‏

 hesham wageeh 

  أول ما طلعة اشاعة كنتاكي كنت في الميدان وواحد اداني سندوتش طعمية خلاني طول اليوم عطشان

ayah al-keiey 

 كنت بافضل ماشيه مترقبه و أول مادخل الميدان كأنى دخلت بيتى و أكثر أمانا كمان

كنت باحس انى أسد وانا باقول يسقط يسقط حسنى مبارك .. و كنت باحب اللى فى الميدان حب بجد !! رومانسي ‎:D‏

عرفت فيها ان الشعب ده عظيم و من بعدها بقى محدش يقدر يقول عليه نص كلمه أدامى

Ibrahim

28 يناير الساعه 2 بالليل قابلت راجل عجوز قالي”يابني سجل اللحظات ده في دماغك لأنك مش هتشوفها تاني أنا بقالي 70 سنه و مشفتش ده

dr, hazim 

 يوم 28 في اسيوط كان متفق التظاهر عند نقابه المحامين الامن كردن المكان، 4 اصحابي مدخلوش عملوا مظاهرة لوحدهم كبرت وجم كسروا الكردون

 esraa salah el masry  

 ابويا دكتور كنبة بمعني الكلمة ولا له فيها مش هنسي وهو يوم 28 فضل مستخبي في عمارة ومعاه اسعافات عشان المصابين

Ahmed Ateyya 

 يوم موقعة الجمل كان فيه بنت جاية مخصوص من سينا. كانت بتقود طبول الحرب وبتصرخ قصور الجنة مستنياكم يارجالة!

 أحمد عبدالحميد

 ولا الراجل الكبير فى السن كان مضروب بالخرطوش فى وشه والناس مخرجينه مسندينه فوقفنا وقال انا عندى اولاد انتم احسن مننا متسيبوهمش

Khaled Farghaly

جمعة الغضب خرجنا من مسجد رابعه نهتف الله أكبر و نبكي مش عارفين ليه وبنتسابق للصف الأول في مواجهة الأمن وبيقولوا علينا دلوقتي كفره

ابني توهني الخروج من أي مساجد عشان مخرجش في المظاهرات روحت لوحدي مسجد رابعه وقابلته بالمظاهره بعد أول قنبله وزعقلي لما شافني

ابني كتب ، أظن أنا الوحيد اللي قابل أبوه صدفه في مظاهرات،وكان هو الكبير و أنا الصغير ومن يومها بعتبر شباب الثوره هما الكبار

جمعة الغضب مش عارف ازاي الناس الكبيره والمريضه مشيت من رابعه بمدينة نصر لميدان رمسيس والتحرير، والله ولاجيوش الدنيا تخطف الثوره

Marian Maher

يوم موقعة الجمل كنت ف البيت وأهلي كانواشبه حابسني،قعدت أتفرج ع المعركةوجاتلي هيستريةضحك وبعدهادخلت أوضتي عيطت بشكل هيستيري

عيطت لماشفت الولد اللي مات وكانوابيجروه ع الكوبري وحسيت بالذنب ليه حديموت عشان حريتي،وقررت أتكلم مع أهلي وأنزل الميدان ونزلت فعلا

فاكرة الرعب اللي كنت بشوفه ف عين ماما وأنا نازلة الميدان.. بس كنت بقولها معلش بس وجودناف الميدان حمايةلباقي الناس اللي هناك

فاكرة أول يوم نزلت فيه الميدان رجعت طايرةوحاسة إني كنت ف عالم تاني..فاكرة بنوتة جات تخبط ع كتفي وتسألني إذاكنت كويسة وللا متضايقة

 فاكرة الخوف اللي كنت بحسه وأنا ف طريقي للميدان و أول ما أوصل كنت بحس بالدفا وسط الناس

SaraA Khalid 

إحساس عمرى ماهنساه كل ماجى أنزل وأنا بحط البطاقة فى جيبى وأقول عشان لو مت يعرفوا مين أهلى وماشحتفش قلب أمى عليا

ولا لما بشوف بنت أو ولد صغيرين بيقودوا الهتاف من على كتف أبهتهم !! وأشوف نظرة الفخر اللى فى عين الأب

روحت التحرير مرة واحده ! وأنا واقفة فى الصينيه رجلى إترعشت ومقدرتش أقف وأقعدت على السور ماما سألتنى مالك قولتلها مش قدرا أدوس على دم الشهدا

لما كنت بمشى فى المسيرة من القائد إيرهيم للشمالية أو يوم التنحى لما مشينا لراس التين كان كل مايجي تيلفزيون فى أى قهوة أقف أطمن على التحرير … ساعتها تيليفونى مكانش بيجيب نت

heba omar

عمري ماحأنسي يوم 25 لما دخان قنابل الغاز خنقني قبل ما أوصل نقابة الصحفيين ، وقفت علي الرصيف أعيط وأهتف وشفت عسكري دموعه نازله

في اول جمعه كنت راجعه من الجرنال علي الدقي وكانت الجموع خارجه من مسجد محمود بتهتف يا أهالينا انضموا لينا وحواليهم كردون أمن

كان جمبي علي الرصيف أم بتشد ولادها عشان تمنعهم يمشوا مع المظاهره وابنها قال البنات اللي ماشيين دول أرجل مني سيبيني ابقي راجل

قررت أنزل من ع الرصيف وأشارك في المظاهره وقلت لأم الولدين خليهم ييجوا معايا دي بلدنا كلنا مش حانقف نتفرج ع الرصيف

بياع البوريك بالعجوه اللي وقف في وسط مظاهرة ميدان الجلاء يوزع علينا ويقول كلوا عشان تقدروا تقفوا علي رجليكم وحاولت أديله فلوس رفض

****************************

تقريبا انا كده خلصت كل الحكاوي الي اتبعتت … والعهدة على الراوي .. الي حابب يحكي حكايته يكتبها هنا في التعليقات او يكتبها على تويتر ويبعتهالي على تويتر

 ღ هبة النيل ღ 

—————————————

 <<<< تابع بقيت الحكاوي 

حكاوي الميدان 1 .. مالك عدلي 

حكاوي الميدان 2 ..   حسام الصياد 

حكاوي الميدان .. 3

حكاوي الميدان .. 4 

أحكي حكايتك في الهاشتاج ده  ‎#ayameltahrir


Advertisements

2 thoughts on “حكاوي الميدان .. 4”

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s