دم الشهيد اولا !!

اليوم : 28 نوفمبر 2011 … اول يوم في الانتخابات البرلمانية بعد ثورة 25 يناير … والموجه الثانية من الثورة في 18 نوفمبر

نزلت انهارده حوالي الساعه 9 صباحا ووصلت لجنة الانتخابات الخاصة بي ولاقيت طوااااااااابير طوييييييييييله جداااااااااا للمنتخبات “لجان سيدات” وحقيقي تأمين اللجان كان على اعلى مستوى من المسؤلين على التأمين وقفت في الطابور و كان من وقت والتاني بيجي ناس تابعه للمرشحين يوزعو على الطوابير ورق فيه دعاية للمرشحين وكمان حزب الحرية والعدالة كان عاملة ترابيزة أمام اللجنة فيها بعض اوراق الدعايا الخاصه بالحزب ولابتوب بيساعد الناخبين بيه معرفة رقم اللجنه وارقامهم ف الكشوفات

حقيقي كنت سعيد بالاقبال الهائل على الانتخاب كان موجود جميع الاعمار من اول الشابات لحد الجدات الي في منهم كان جاي على كراسي متحركة … مقدرش ادخل في نواياهم واقول انهم خافو من الغرامة وجم ينتخبو .. ولكن بعض السيدات الي كانو حواليا كانو بيتكلمو في موضوع ال 500 جنيه ده ولكن في الاغلب من الي حواليا كانو متحمسين انهم ينتخبو

مئات السيدات في انتظار دورها
تأمين المقار من الداخل
ترابيزة الاخوان خارج مقر الانتخاب

لكن كل ده مرجعنيش عن نيتي الي نويتها بليل .. اني ادي صوتي للي يستحقه .. اني ادي صوتي للشهداء .. قررت اني انزل ” ومش عشان الغرامة” قررت اني انزل عشان اصوت لكل شهداء مصر .. اذاي هيجي مجلس شعب يقعد على مقاعد دفع تمنها اكثر من 1000 شهيد حتى الان مفيش واحد فيهم حقه رجع ؟؟ اذاي هيقعدو في مكان عشان يوصلو له فقد اكتر من 4000 شاب اعز ما لديه .. نور عنيه … ولسه.. ده لسه الدم مبردش والي حصل في محمد محمود وعند وزارة الداخليه وهنا في اسكندرية والسويس ودمياط وغيرهم …  لسه الدم منشنفش من الارض وريحته في الهوا حوالينا

هيقعدو في البرلمان وام الشهيد تتفرج عليهم ب أي حق .؟ مش لما نجيب حقهم وحق كل مظلوم يبقى نعمل مجلس شعب بيعبر عن الشعب الحر مش الشعب المظلوم ؟

وبعد طابور 4 ساعات مقدرتش غير اني ادخل واكتب لهم كده في كل ورقه

دم الشهيد أولا

أعطي صوتي لشهداء الثورة 
لا أعترف بانتحابات تقوم على دماء الشهداء 
حاكموا القتلة أولا 

وطول محنا كده وطول ما الي قتل وظلم وفقأ عين شباب مصر لسه حر طليق لو اتعمل مليون انتخابات هفضل ادي صوتي للشهدا

طول مالي بيحكمنا ظالمنا يبقى مفيش اي تغير الا بعد رفع الظلم … انا مبلومش اي حد راح انتخب ولا هلومه بالعكس انا سعيده بيه .. انت قدرت تسامح وبتحاول تكمل وده كويس مش وحش .. بس انا شخصيا مش قادرة اسامح ولا انسى ولا اكمل طول ما الظلم لسه معشش

المجد للشهداء .. المجد للمصابين

 أحمد حرارة – ومالك مصطفى – وأحمد عبد الفتاح .. انتوا نورتو بصيرتنا وحقكم مش هيضيع 

جيل مع إيقاف التنفيذ

خرج هذا الجيل من رحم الانتصارات … انه جيل الثمانينات … خرج كل منا بعدما انتصرت مصر في اخر معاركها واستردت اخر شبر في سيناء من فم مغتصبيها … لم نكن ندري انه سيكون فيما بعد … جيل مع ايقاف التنفيذ !!

جيل تعلم ليجد ان كل ما تعلمه مجرد معلومات لن تفيده في حياته فيما بعد ولا في حياته العمليه .. تعلمنا في المدارس بالاكراه مواد لم نفهمها وكان الاهم لدى اهالينا ان نجتاز الامتحانات ولم يكن مهما لهم ما إذا كنا قد استفدنا مما تعلمناه شيئا ام لا ..

خرجنا لندرس في جامعات فرضت علينا بسبب مجموعنا في الثانوية العامة ولم تكن تتناسب مع طموحاتنا التي لم تاهلنا لنا دراستتنا المدرسية .. ف الحاصل على 95 % علمي يضطر احيانا ان يدرس في كليه التجاره لان كليه الهندسة التي هي طموحه قد قرر وزير التربيه والتعليم ان تقبل الطلاب الحاصلين على 95,1%  … واصبح حلم الالتحاق بالدراسة المناسبه له حلم مع ايقاف التنفيذ

وايضا من أهله مجموعه ودخل الجامعه التى تمناها بعدما حرم نفسه من متع الحياه و “انكفى على الكتب” لكي يلتحق بالدراسة التي طالما حلم بها ويصل اليها ويكن طموحه ان يستكمل ف الدراسة و يجد بعد ما كان هو أول دفعته .. ابن الدكتور فلان اصبح هو في المنصب لمجرد انه “ابن الدكتور فلان”  … وتحول هو الاخر الي حلم مع ايقاف التنفيذ

ويتخرج من الجامعه و يقرر ان يتزوج من الفتاه الي احبها واحبته طوال فتره الدراسة .. وبعد ان التحق بعمل يجعله يستطيع العيش .”مجرد العيش” يذهب ليتقدم لخطبتها فيجد كم هائل من الطلبات لو ظل حتى الستين من عمره يعمل لن يستطيع ان يلبي نصف تلك الطلبات … ويصبح حب مع ايقاف التنفيذ

هذا الجيل أصبحت حقوقه في الحياه مجرد طموح.. يحلم ب عمل مناسب و بيت يعيش فيه وشخص يحبه يستطيع ان يتزوجه ويشاركه حياته … هذه الاشياء التي هي في اي دولة ف العالم اقل الحقوق اصبحت لنا احلام … احلام مع ايقاف التنفيذ .. وحياة مع ايقاف التنفيذ .. واصبح جيل مع ايقاف التنفيذ

وعندما قرر ان يصنع ثورته على كل تلك الانتهاكات في حقوقه … قرر الجيل السابق له “فلول العهد القديم  ان يجعلها ثورة مع ايقاف التنفيذ لتلتحق ب احلامنا وطموحاتنا التي دفنت في زخم الحياه

كم ابكي هذا الجيل الذى عانى في هذه البلد اكثر من اي جيل اخر .. الذي قرر الكثير منه الهروب والبحث عن طموحاته المؤدة في بلاد اخرى .. فهذه البلاد لم تعد كبلادي

كم ابكي هذا الجيل الذى أنا منه الذي اصبح …. جيل مع ايقاف التنفيذ !

جيل مع إيقاف التنفيذ

حد فـــــــــــــاكر؟؟

محمد سعد ترك طالب كلية طب الاسنان المخطوف من امن الدولة من شهر 7 سنة 2009 وحتى الان غير معروف مصيره
محمد صلاح: اتخانق مع أمين شرطة لأنه ركب معاه التكتك وكان عايز ميدفعش الأجرة .. استدرجه أمين الشرطة للقسم وعملوله حفلة ضرب وتعذيب انتهت بوقوعه من الدور التالت في القسم .. محمد أصيب بكسور في كل جسده ونزيف داخلي واشتباه ارتجاج في المخ .. المجرم اللي ضرب محمد أفرج عنه وأمه ست غلبانة بيتم تهديدها يوميا بتلفيق قضية مخدرات لابنها لو متنازلتش.. محمد اتحقق معاه في المستشفى بدون وجود المحامي بتاعه وفي حضور المخبرين اللي ضربوه!
سمية أشرف ... الفتاه التي أعتدى عليها ضابط حرس الجامعة بالضرب 2010
اسمي: مصطفى عطية، كان عندي 39 سنة.. اتسحلت في شوارع اسكندرية لغاية ما خسرت أغلى ما أملك وهو حياتي .. ولادي تلاته، آسر 4 سنوات. وحنين سنتين. وسما سنة واحدة. الّي شافوني وانا بتسحل شهود محبوسين في قسم شرطة مينا البصل لاجبارهم على تغيير شهادتهم بالاكراه. المخبرين والمباحث مانعه الحقيقة من الظهور.. مانعين اهلي والناس عن جثتي. محاصرين المشرحة. دمي في رقبتكم يا مصريين. يا مصريين
أحمد شعبان .. استشهد على إيد مجرمين من جزارة الداخلية.. قتلوه الجبناء بدم بارد ورموا جثته في ترعة المحمودية .. لازم منسكتش ولازم نتحرك وننظم نفسنا ونفهمهم .. جلادي قسم سيدي جابر لازم يقفوا عند حدهم .. ده شاب عمره ١٩ سنة يا من فقدوا الاحساس بالانسانية يا أصحاب الضمير الميت .. لازم ننظم وقفة وننزل كلنا ونتحرك .. لازم بجد منسكتش
الشهيد السيد بلال مع ابنه ... ايه الجريمة اللي ارتكبها عشان يتصعق بالكهرباء من أعضاؤه التناسلية أثناء التحقيق معاه لحد ما يجيله هبوط حاد في الدورة الدموية ويموت؟ .. والله اللي حصل ده مينفعش يتسكت عليه ولازم كل مصري وطني شريف يتحرك لأن سيد ده واحد مصري له نفس الحقوق اللي كلنا بنطالب بيها
!! حكم على قتلت خالد سعيد بالسجن المشدد 7 سنوات

 ملحوظة أغلب الصور والمعلومات من أرشيف صفحة كلنا خالد سعيد