فضفضة

فوضى مشاعر
اليوم 3 فبراير 2012

المكان الاوضة المكركبة بتاعتي

التوقيت الساعه 5 فجرا

بما اني حسه اني جوايا كتلة حزن مش عارفه اطلعها ف انا قررت افضفض شوية يمكن اطلع شوايا من ال جوايا

عايزة اتكلم عني شوية أنا حد عادي جدا وانا طفلة عندي 11 سنة فقدت ابويا في حادثة .. ابويا الله يرحمه كان موظف بسيط مات في حادثة عربية وهو راجع من بورسعيد يوم 14-4-1994 .. انا بنت وحيدة وبعد ما ابويا مات امي خلتني راجل البيت

عشت من يوميها بحلم بالامان .. في حاجات كتير قوي في حياتي خلتني فقدة للاحساس ده .. اهمها ان بابا مش موجود

طول عمري لما بحلم بالامان بحلم اني انا الي اصنع الامان ده .. نفسي يبقالي بيت بتاعي شغلي حياتي

اتخرجت من كلية الاداب قسم المسرح .. بس محاولتش اكمل لاني مبحبش ابقى مشهورة غيرت مجالي خالص ورحت درست كمبيوتر وتصميم واشتغلت في المجال ده اربع سنين .. بعد ما اشتغلت اول مرة في حياتي في سيبر وتاني مرة سكرتيرة .. وبعد عدة تجارب مريرة في حياتي عرفت اقف على رجلي واعمل حاجات انا عايزاها .. اهمها اني بقيت بصور

انا يمكن اكون احسن من ناس كتير .. بس انا من الناس الي مش عارفه تشتغل من وقت ما حصل في البلد الي حصل

يمكن اكون مضرورة ماديا … يمكن يكون نفسي في حاجات كتير مش قادرة اجيبها او اعملها بس مش هاممني

كل الي هامنني اني اعيش في بلد ليا فيها كرامه حتى لو هكون فقيرة

عارفين احلامي ايه ؟؟ نفسي مشوفش حد بياكل من صندوق زباله .. ونفسي مشوفش حيوان ميت في الشارع

نفسي مشوفش طفل متغطي ببواقي بطانية وملوف بيها في عز البرد عشان ملوش بيت

على فكرة انا كنت ممكن ابقى زيهم … لولا فضل ربنا ومن بعده أمي

ايوة كنت ممكن ابقى زيهم لما فقدت ابويا وانا عندي 11 سنة لو مكنش ليه معاش ولا كان ليا ام زي امي كنت ممكن اكون زي اي طفل من دول 😦

انا مكنتش اعرف يعني ايه ثورة مكنتش اعرف ولا افهم يعني ايه سياسة اصلا لحد ما خالد سعيد مات وقتها كنت بشتغل في شركة كويسة وكنت نوعا ما مستقرة في حياتي … بس بعد الي حصل لخالد حسيت حاجات كتير قدامي بتوضح وبتتغير

حسيت بالديكتاتور الي بشتغل معاه .. طبعا ديكتاتور صغير مش هو لوحده كل ديكتاتور في الشغل كل همه يمص دمك وياخد منك وميدكش حقك .. سبت الشغل ومن يوميها وانا مش عارفه اشتغل

مش عارفه اشتغل مش عشان مفيش شغل .. مش عايزة اشتغل عشان مش عايزة ديكتاتور تاني يتحكم فيا

قبل الثورة كنت نشيطة اكتر من كده بس نشاطي كان اليكترونيا يمكن مبعرفش اهتف زي ناس كتير

بعد الثورة بقى عندي احلام كتير قوي نفسي احققها … ولكني اتصدمت بالي حصل لينا .. شوفت الي جم يسرقوا احلامنا من تاني

سرقو حلمي وحلم جيلي كله وحلم كل شاب مات واتصاب عشان يعرف يعيش بكرامه

على فكرة احنا الكرامه عندنا اهم من الاكل .. والله اهم من الاكل والشرب كل واحد نزل وضحى بوقته ودمه وعمره وفلوسه مش هاممنا الا الكرامة .. اصل الي يعيش مرفوع الراس تهون عنده اي حاجه تانيه

انا مش عايزة غير اني اعيش بكرامه .. عايزة الي بسمعه في دول اوربا عن كرامة المواطن يبقى عندنا … انا عايزة حقي في البلد دي .. وحق ابويا الي في يوم حارب عشانها وعشان ارضها

انا عايزة اعيش مش عايزة حاجه من حد … عايزة حقي اني اعرف اعيش عايزة يبقالي بيت مبقاش خايفة من صاحب البيت الي جايب بلطجية فيه عشان يطفشنا ويهده عشان مفيش قانون يحمينا

عايزة احس بالامان والكرامة عايزة يوم ما اتعب اعرف اتعالج علاج كويس من غير ما ادفع الاافات

عايزة احلم اني ابقى ام .. انا بخاف قوي من الحلم ده .. طب اجيبه اقوله ايه .. يوم ما يقولي خلفتيني ليه وانتي مش عارفه تربيني في البلد دي ارد اقوله ايه

سبونا ننعيش انتوا عشتو وسرقتوا ونهبتوا البلد … سيبونا احنا نعيش لينا شوية .. دي الي جاي ليكم ولينا مش قد الي راح

انا عندي حلم واحد دلوقتي نفسي احقققه .. نفسي اعيش .. او اموت .. بس بكرامة

Advertisements

One thought on “فضفضة”

  1. تسلمى وتسلم ايدك …انتى اتكلمتى عن ناس كتييير زيك وانا منهم …انتى مش لوحدك ….
    منشوارتك كلها رائعه ما شاء الله …تحياتى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s