TEDx ست الكل .. اثبت للعالم انك موجود

من 4 أيام شوفت صورة صديقتي دينا سليمان منورة على بانر أنها هتبقى متحدثة في TEDx  قولت أوبااااا واحده من أصحابي وصلت أخيرا حد فينا فلح في حاجه 🙂 المهم بعتلها اني لازم اروح عشان اصورها وهي كانت طايرة من الفرح زي منا كنت طايرة من الفرح بيها

بصراحة اأنا كنت رايحة أصور دينا وهخلع وقولت أكيد الباقي شوية بنات هيقعدوا يرغوا في أي كلام وملل بقى “كعادة الفعاليات المعهودة” ولا تقريبا السياسة حسستني اني بقى كله بقى يشبه بعضه

المهم وصلت ودخلت أنا ودينا وكانت أول متحدثة واقفه على المسرح

الروائية .. رانيا حمدي 

DSC_7925
رانيا حمدي

للاسف انا روحت في أخر كلام رانيا … بس دخلت لاقيت بنوته جميله واقفة على المسرح بتدور على باباها ومامتها الي لسه مجوش وهي عمالة تطول عشان نفسها يلحقوها ويشوفوها وهي بتحكي عن تجربه نجاحها … حسيت بيها قوي لاني زمان لما كنت بقف على المسرح أمثل كنت ببقى زعلانه قوي اني مفيش حد معايا من أهلي وحسيت بفرحتها قوي أول ما شافتهم دخلوا وحسيت وشها نور ونبرة صوتها بترقص …

المتحدثة التالية

أماني عيد 

أماني عيد
أماني عيد

تجربة مختلفة أمرأة عمليه قررت تنجح غصب عن عين التخين أشتغلت في شركات كبيرة قوي في مصر كانت كفيله انها تقول فل كده وشكرا أنا عايشه ملكة زماني منصب كويس في شركة مالتي نشيونال … بس الي لاقيته في أماني أنها رافضه تكون بطموح له سقف وقررت تسيب الشركات المالتي نشيونال وبدأت تكتب وتسافر أمريكا تحضر دورات تدريبة وتكسر قيود الوظايف العادية الي بتحبسك على مكتبك وبتخليك تنتمي لكيانات بتقتل جواك الاحساس بالحياة

أماني علمتني أني ممكن في أي وقت في حياتي أقدر  أبدا من جديد وأنتقل من مكان لمكان  حتى لو كنت شايفه نفسي على قمة النجاح …

المتحدثة التالية

دينا على ماهر

دينا على ماهر
دينا على ماهر

الاستاذة مقدمة الفاعليه وهي بتقدم دينا حسستنا أننا هنقابل متحدثة زي ما قالت كده بتتكلم بالشوكه والسكينه أكمنها حفيدة على باشا ماهر و مدربة فن الاتيكيت … بس بصراحة قابنا وش بشوش مبتسم وأكتشفنا موضوع الاتكيكيت ده ملوش علاقة بالشوكه والسكينة 🙂 له علاقة بالزوق وأداب المعاملة والروح الحلوة الي تقدر تملى بيها مكانك وانت بتتكلم بصوت مسموع يحسسك بالراحة النفسية … دينا وريتنا أن بحاجات بسيطه قوي تقدر تغير ستايل حياتك زي ما قالت الشغل والرياضة والتواصل الاجتماعي وخدمة المجتمع دول أربع حاجات لو حققنا فيهم جزء من النجاح هنحس بسعادة في حياتنا وطلع الموضوع مش كيميا 🙂

الي بعد كده بقى كانت مفاجأة بالنسبة ليا

ســــــارة البطراوي

سارة البطراوي
سارة البطراوي

أسم أول مرة أسمعه ولا اعرف عنها حاجه … ضحكة متحركة شايلها بنوته واضح أن الدنيا غلبتها كتير … سارة بتاعت عرايس … اه بتاعت عرايس مسرح عرايس .. ساره بمساعدة باباها ومامتها عملت مسرح عرايس وبقت بتصمم عرايس وبتحركها … سارة كيان ناجح متحرك مع ان الدنيا لطشت فيها كتير كان باين من لمعت عنيها قبل ما هي تحكي … بس عندها اصرار انها تنجح .. الاهم الي شوفته عند سارة والي انا حتى الان مش بعرف اعمله هو انتقال الحلم من مجرد فكرة لحيز التنفيذ أنها تقوم وهي زهقانه تجيب شويه فوم تعمل بيهم عروسة !! أنها في وسط أزمة الثورة الي انا شخصيا وقفت حياتي ساره اشتغلت وحققت حاجه حلوة جدا في وقت صعب جدا .. ساره انا اكبر منك بس انتي في نص ساعه علمتيني كتير … بجد بحبك

بريك

عدنا

شيماء عبد الحميد (شيمو فلوت) 

شيماء عبد الحميد
شيماء عبد الحميد

أول ما تشوفها تقول دي لسه في الكلية … هي لسه في الكلية … بس بقت معيدة في الكلية .. بنوته زي السكر … رغم أنها كانت بتقول أنها مش عندها حاجه تقولها بس حكيت لينا عن تجارب كتيييييييير في حيايتها صعبة وجميلة … وعن مسابقة المنوفية الي الفلوت في عصلج معاها واتصلت جابت باباها من اسكندرية عشان يرجعها من المنوفية وبعد ما راح لها قالته لا انا هكمل بقيت المسابقة وفازت بيها بالمركز الاول … شيماء تجربة شبهه تجارب كتير … بس ميزتها أننا بتضحك للحياة والي بيضحك في وش الحياة عمرها ما بتعرف تهزمه

المتحدثة التالية (بالانجليزي) 🙂

Ambassador Birgitta

Ambassador Birgitta
Ambassador Birgitta
 الي انا فهمته أنها سفيرة السويد في العراق والاردن ومصر 🙂 مش هتكلم أكتر من كده لاني مفهمتش 90 % من كلامها للاسف وده قصور مني … بس معتقدش اني هقدر اتكلم عن قصة نجاحها أكتر من منصبها الي خلالها وصلت تبقى سفيرة في بلاد عربية 🙂
نيجي بقى عند صحبتي 🙂
دينا سليمان
دينا سليمان
دينا سليمان
أنا قبل ما دينا تتكلم وتحكي حكايتها كنت متخيله اني اعرفها … بس طلعت معرفش عنها حاجه … دينا طلعت بتواجه أصعب أنسان في الكون … نفسها … بتقدر تقف قصادها وتجبرها على التحدي والنجاح “لوحدها” دينا كل الي كنت اعرفه عنها تاء الخجل وانها بتكتب روايات … بس دينا أروع مما كنت أتخيل … دينا قدرت تركب طياره لوحدها وتسافر ألمانيا وتروح تستلم جايزتها “لوحدها” دينا أنا أكتشفت اني اقدر اعمل حاجات كتير قوي لوحدي بس انا الي بكسل … شكرا دينا عرفتيني أن كلمة لوحدي دي انا فزاعة أنا بخلقها لنفسي طول الوقت عشان أفضل في مكاني
مسك الختام
كارمن حسن
كارمن حسن
كارمن حسن

كارمن أكتر واحدة احلامها شبهه احلامي “التصوير” كارمن مرت بتجارب في حياتها العمليه كتير بس الجميل في كارمن أنها بتكمل مبتقفش … وبتقعد مع نفسها كتير وتعرف هي عايزة ايه وتكمل حتى لو بتروح لحته تانيه في الحياة تاخد منها الي هي عايزاه عشان تحقيق حلمها … كارمن … أنتي هتحققي كل الي انتي عايزاه عشان انتي تستاهلي ده وهتبقى أحسن Food Photographer قبل 2017 بكتير قوي 🙂 … نورتي جوايا حاجات كتير يا كارمن

………………………
في النهاية العامل المشترك عند كل البنات دول حاجه اساسية هي الاصرار على النجاح … وضوح الرؤية … مفيش حاجه بتعرف توقفهم … شكرا ليكم أتعلمت منكم كتير 🙂

 لمشاهدة باقي الصور

Advertisements

2 thoughts on “TEDx ست الكل .. اثبت للعالم انك موجود”

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s