أرجو عدم نشر هذه الرسالة .. لعنة الشيخ صاحب الورقة !

في يوم من أيام الطفولة في بداية التسعينات الايام الجميلة اللي بنترحم عليها دي .. وأمي معديه من جنب باب الشقة لاقيت ورقه محطوطه على شراعه الباب ف تخيلت انه جواب راحت تجيبه لاقيتها ورقه .. بتفتحها لاقيت رسالة بتحكي ان في شيخ من الشيوخ حلم بسيدنا النبي وطلب منه ينشر الحلم ده وفي اخر الجواب طلب بالدعاء لفتاة مريضة بالشفاء وتحذير ووعيد للي هيرمي الورقة دي أو ميصورهاش ويوزعها على 20 واحد بأنه هجيله مصيبه في خلال أيام قليله وتحذير أخر بعدم رمي الورقة وبأن أم فلان رمتها وحصلها مصايب الدنيا والاخرة .. وبشرى بالخير في خلال أيام للي هينشر الرسالة زي ما هو مطلوب .. أمي أصابتها حالة من الذعر وطلبت من أبويا الله يرحمه أنه يعمل كده وبالفعل عملوا كده ومعرفش الصراحة اتوزعت على مين تاني أو مين كان العشرين مبشر بالاخبار السعيدة أو التعيسه على حسب ما الورقة بتقول.

واللي زاد وغطى أن أمي فضلت شايله الورقة دي سنين في درج الشيفونيرة عشان خايفة ترميها احسن مصايب الدنيا تهل علينا – مع أن المصايب كانت موجوده بالورقة ومن غيرها 🙂 – المهم في يوم وانا في ثانوي لاقيت الورقة بالصدفه قولتها يااااااااه انتي لسه شايله الورقة دي ؟ يا أمي ده نصب انا هرميها قعدت تصوت وتقولي لا بلاش احسن يحصلك حاجه وفي الاخر اقتنعت اننا نحرقها عشان فيها دعاء واسم سيدنا النبي طبعا وهي متخيله اني هتصيبني لعنة الشيخ صاحب الورقة.

ومرت السنين لحد ما بدأنا إستخدام النت وبدأت الورقة دي تظهر بشكل تاني – إليكترونيا – على سيبل دعاء من 1000 سطر في المنتديات مثلا يتبعتلك ومفروض تقراه وتنشره عشان يجيلك خبر حلو أو يجيلك مصيبه لو منشرتوش!

واستمرت هذا الظاهرة حتى وصلنا للفيسبوك وتويتر وطبعا البوستات والرسائل دي معروفة واللطيف انها لازم تكون في عدد لا نهائي من الأسطر ومش عارفه الهدف من ده إيه؟ إني اقرأ في ادعيه أصلا عمري ما شفتها غير على النت وأغلبها أدعية أو معلومات دينيه غلط … لا وحاليا بقى الناس بتدعي على بعضها يعني يارب تنشل لو مأرسلتش هذه الرسالة !!

أنا كل ده وممكن أستوعبه وأقول ناس عايزة تاخد ثواب أو أو أي كان مبررهم الديني

بس اللي بيعملي أزمة إستيعاب حاليا رسائل Whats App & Facebook اللي بيبعتوها الناس لبعض وطبعا هي رسالة بالعربي أو بالانجليزي بتحذر المستخدم أن الأكونت بتاعه هيتلغى أو هيتحول لغير مجاني لو مبعتش الرسالة دي ل عشرين مستخدم – هما هما العشرين بتوع التسعينات- وبسأل نفسي هو انت مفكرتش هو الراجل صاحب الواتسأب ولا الفيسبوك هيعرف منين أنت بعت الرسالة دي في الإنبوكس بتعاك ولا لا .. مهو لو بيعرف انت بتبعت ايه يعني كده انت متراقب ياحلو؟ يعني هو إحنا بغبغانات حتى بينا وبين روحنا مفيش تفكير لثانية!؟

أخي المستخدم أختى المستخدمه وحيااااااااااة العشيين نفر اللي وجعتوا قلبهم معاكم من سنين اللي بتعملوه ده اسمه ازعاج وجهل وقلة وعي … فكروا يرحمكم الله

بس خلاص

THINK ! background

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s